مەكتەپ اسحانالارىنداعى اس مەزٸرٸن قايتا قاراۋ كەرەك. بۇل تۋرالى قر وقۋ-اعارتۋ مينيسترٸ اسحات ايماعامبەتوۆ ايتتى, دەپ حابارلايدى قازاقپارات.
مينيسترلٸكتٸڭ اپپارات جينالىسىندا اسحات ايماعامبەتوۆ مەكتەپتەردە بالالاردى ىستىق تاماقپەن قامتاماسىز ەتۋ مەسەلەسٸنە توقتالدى.
«قازٸر ىستىق تاماقپەن قامتاماسىز ەتۋ كٶرسەتكٸشٸ ٶسٸپ وتىر دەيمٸز. بٸراق ودان بٶلەك قازٸردٸڭ ٶزٸندە ىستىق تاماقپەن قامتاماسىز ەتٸپ وتىرعان اسحانالاردىڭ جۇمىسىن جەتٸلدٸرۋدە جٷيەلٸ جۇمىس بولۋى كەرەك. ول بويىنشا كوميتەت تيستٸ زاڭنامالىق ٶزگەرٸستەر دايىندادى. اس مەزٸرٸن دەنساۋلىق ساقتاۋ مينيسترلٸگٸمەن بٸرگە جاڭادان قاراۋىمىز كەرەك», - دەدٸ ول.
مينيستر مەكتەپ بۋفەتتەرٸندە باعاعا قاتىستى دا پروبەمانىڭ بار ەكەندٸگٸن باسا ايتتى.
«ەر بٸلٸم بٶلٸمٸ, ەر بٸلٸم باسقارماسى بۇعان كٶڭٸل بٶلۋٸ كەرەك. ەلوردا مەكتەپتەرٸنٸڭ ٶزٸندە باعانىڭ ٶسۋٸ بار. 0,5 ليتر سۋدىڭ باعاسى 350 تەڭگە دەگەن ماسقارا. باسقا وبلىستار دا مەكتەپ اسحانالارىنداعى باعانى قاراڭىزدار. وسى مەسەلەنٸ جٷيەلٸ شەشۋ ٷشٸن تيٸستٸ زاڭنامالىق ٶزگەرٸستەر ەنگٸزەمٸز. جاڭا وقۋ جىلىنا دەيٸن بۇل پروبلەما شەشٸلۋٸ كەرەك», - دەدٸ اسحات ايماعامبەتوۆ.
سونىمەن قاتار ول بالالاردى قاۋٸپسٸز تاپسىمالداۋ ٷشٸن بيىل 515 اۆتوبۋس ساتىپ الىناتىندىعىن اتاپ ٶتتٸ.
«ول جۇمىستى تامىز ايىنا دەيٸن بٸتٸرۋٸمٸز قاجەت. كەيبٸر ٶڭٸرلەر بۇل جۇمىستى ەلٸ باستاعان دا جوق. بٸز رەسپۋبليكالىق دەڭگەيدە بۇل مەسەلەنٸ سٸزدەرگە شەشتٸك, تيٸستٸ قۇرالداردى بەردٸك. مەسەلە جالپى شەشٸلٸپ وتىر. ەندٸ سونى اياعىنا دەيٸن جەتكٸزٸپ, جۇمىستى جاڭا وقۋ جىلىنىڭ باسىنا دەيٸن بٸتٸرۋ قاجەت», - دەدٸ مينيستر.
