Foto: yakutia-daily.ru
Ulttyq ekonomika ministri Álibek Qýantyrov turǵyndardy qys kezinde páterdegi tómen temperatýraǵa úirenýge shaqyrdy, dep habarlaidy QazAqparat.
«20-21 gradýsty quraityn qalypty normalarǵa úirený kerek. Qysta bul temperatýra qalypty dep sanaimyz, sebebi resýrstardy únemdeý qajet. Bizdiń elde adamdar úidegi joǵary temperatýraǵa ábden úirenip alǵan. Munyń saldary jylý berý jelilerine tym joǵary salmaq túsirip otyr», - dedi Qýantyrov Parlament Palatalarynyń birlesken otyrysynan keiin tilshiler suraǵyna jaýap bere otyryp.
Onyń aitýynsha, jylý boiynsha normativ - 21 gradýs shamasynda. Turǵyndar qysta 23-25 gradýsqa úirenip qalǵan jáne ony tiisti normaǵa túsirgende, halyq shaǵymdana bastaidy.
Sondai-aq ol qysta terezeni nemese balkondy ashý arqyly temperatýrany rettemeýge shaqyrdy.
«Bizde arnaýly qurylǵylardy ornatý kerek, bul rette turǵyndar páterdegi jylýdy qadaǵalap, energiiany únemdeýge nazar aýdara bastaidy. Jalpy, elimizdegi infraqurylymdy jańartý shyǵyndary tek tarif esebinen ǵana emes, sonymen qatar biýdjet qarajatyn igerý arqyly iske asyrylady. Tarif deńgeii adamdarǵa salmaq túsirmeýi kerek. Halyqtyń áleýmettik osal toptaryna ákimdikter arqyly ótemaqy tóleý múmkindigi bar», - dedi ministr.
