Densaýlyq saqtaý ministri Aleksei Tsoi elimizdiń koronavirýsqa qarsy jappai vaktsinalaý naýqanyna daiyndyǵy týraly aitty, dep habarlaidy QazAqparat.
Ortalyq kommýnikatsiialar qyzmetindegi baspasóz máslihatynda sáýir aiyndaǵy jappai erikti túrde vaktsinalaýǵa Qazaqstannyń daiyndyǵy týraly suraldy. Atap aitqanda, halyqtyń 60 paiyzy sáýirde ekpe saldyrǵysy kelse, olardyń barlyǵyn vaktsinamen qamtamasyz etý múmkindigi týraly suraq qoiyldy.
«Biz osy naýqanǵa daiyndalyp jatyrmyz. Osy merzimde qazaqstandyq vaktsina paida bolýy múmkin. Vaktsinalaý jelisi bizde qurylǵan. Jalpy, dárigerler bul naýqanǵa daiyndaldy. Barlyǵy ekpeniń kelip túsýi kólemine bailanysty bolatyny anyq», - dedi ministr.
Tsoi barsha álemde vaktsinanyń tapshylyǵy sezilip jatqanyn atap ótti.
«Naryqqa vaktsinanyń kelýi deńgeiine qarai biz barsha Qazaqstan boiynsha vaktsinalaýdy qamtamasyz etemiz. Atap aitqanda, tońazytqysh jabdyqtar tekseristen ótti. Eske sala keteiin, tumaýǵa qarsy vaktsinalaýda bir ai ishinde 2 mln-nan astam adamǵa ekpe salyndy. Sondyqtan biz úshin osyndai kólem qalypty túrde iske asyrylady. Eń bastysy, ekpeniń tiimdiligin kórip, vaktsinalaý oryndaryna kelip, erikti túrde koronavirýstan ujymdyq qorǵanysty qoldaǵany mańyzdy», - dedi vedomstvo basshysy.
Osy oraida ol kezeń-kezeńmen el halqy ekpe saldyrýdan ótetinin naqtylady.
Budan buryn habarlanǵandai, QR Densaýlyq saqtaý vitse-ministri Ajar Ǵiniiat Qazaqstanda qashannan bastap maskasyz júrýge bolatynyn aitty.
«Halyqtyń ortasynda ujymdyq immýnitet qalyptaspai, halyqtyń 60 paiyzdan astamy vaktsinalaýdan ótpei, maskany sheshýge bolmaidy. Ujymdyq immýnitet qalyptasqannan keiin ǵana maskasyz júrýge bolady», - dedi vitse-ministr.
