27 naýryzda ǵalamshar turǵyndary Búkilálemdik jabaiy tabiǵat qory bastamashy bolǵan «Jer saǵaty» aýqymdy aktsiiasyna qatysady. Qazaqstan da bul sharaǵa kezekti ret atsalysady. QR Ekologiia, geologiia jáne tabiǵi resýrstar ministri Maǵzum Myrzaǵaliev óz Twitter paraqshasynda qazaqstandyqtardy osy ekologiialyq naýqanǵa belsendi qatysýǵa shaqyrdy.
«Búgin Qazaqstan dástúrli túrde álemdegi eń aýqymdy «Jer saǵaty» ekologiialyq aktsiiasyna qatysady. Bul kúni 180 eldiń milliondaǵan turǵyndary 1 saǵatqa jaryq pen elektr qurylǵylaryn sóndiredi. Aktsiianyń negizgi maqsaty – adamzatty tabiǵatqa janashyrlyq tanytýǵa, ǵalamshar klimaty men onyń shekteýli resýrstaryn saqtaý úshin sharalar qabyldaýǵa shaqyrý. Qazaqstanda «Jer saǵaty» aktsiiasy jyl ótken saiyn tanymal bolyp keledi. Eger buryn naýqandy tek iri qalalar qoldasa, sońǵy eki jyl qatarynan barlyq óńirler qosylyp jatyr», - dep jazdy ministr.
Maǵzum Myrzaǵalievtiń oiynsha, aktsiia álem halqyn ekologiialyq problemalardy sheshý jolynda biriktiredi.
«Biyl Búkilálemdik jabaiy tabiǵat qory «Jer saǵaty» aktsiiasyn ekologiialyq ashyqtyq taqyrybyna arnady. Ekologiialyq problemalarǵa bei-jai qaramaityn barlyq azamatty osy álemdik naýqanǵa qatysýǵa shaqyramyn. Jergilikti ýaqyt boiynsha 20:30-da bir saǵatqa jaryqty sóndirý kerek. Bul bar ǵalamnyń ekologiiany qorǵaý men saqtaý jolynda birigýine zor serpin beredi dep senem», - deidi vedomstvo basshysy.
Aita keteiik, aktsiiaǵa Ekologiia, geologiia jáne tabiǵi resýrstar ministrligi, Qazaqstannyń ekologiialyq uiymdarynyń qaýymdastyǵy, «Halyqaralyq jasyl tehnologiialar jáne investitsiialyq jobalar ortalyǵy» KEAQ, «Jasyl» ekonomika jáne G-Global-dy damytý koalitsiiasy» ZTB, «QazExpoCongress» ulttyq kompaniiasy» aktsionerlik qoǵamy, «Eco Fund Tabigat» qoǵamdyq qory men ákimdikter qatysady. Jergilikti ýaqyt boiynsha 20:30-da elordada Aqorda, Máńgilik El monýmenti, Áziret sultan meshitteri sekildi nysandardyń dekorativti jaryǵy óshiriledi.
Eifel munarasy, Big Ben, Kolizei siiaqty álemniń tanymal sáýlet eskertkishteriniń de jaryǵy 1 saǵatqa sónedi.
