QR Premer-Ministriniń orynbasary – Syrtqy ister ministri Muhtar Tileýberdi qazaqstandyq delegatsiianyń taiaýdaǵy Aýǵanstanǵa saparyna qatysty túsinikteme berdi, dep habarlaidy QazAqparat.
«Delegatsiia Aýǵanstanǵa gýmanitarlyq kómek kórsetý jónindegi arnaýly missiiamen bardy. Halyqaralyq qoǵamdastyqta Aýǵanstandy ekonomikalyq kollapska, gýmanitarlyq daǵdarysqa túsirýge bolmaidy delingen ortaq túsinik bar. Óitkeni, munyń naqty táýekelderi men syn-qaterleri bar. Eń aldymen bul esirtki tasymalynyń, din ekstremizmniń artýyna, sonymen qatar bosqyndardyń kóbeiýine alyp keledi. Birinshiden – gýmanitarlyq kómek kórsetý, ekinshiden – jańa ekonomikalyq bailanystar ornatý. Aýǵanstan ekonomikasynyń kúireýine jol bermeý úshin múmkindik usyný qajet», - dedi Muhtar Tileýberdi Úkimet otyrysynan keiin BAQ ókilderine bergen suhbatynda.
Ministr «Taliban» qozǵalysyn (Qazaqstanda tyiym salynǵan) halyqaralyq qoǵamdastyq moiyndaǵamandyǵyn atap ótti. Al ony halyqaralyq qoǵamdastyq moiyndaýy úshin BUU qaýipsizdik keńesiniń qarary qajet.
«Barlyǵy da ekonomikalyq daǵdarystyń oryn alýy múmkin ekendigin túsinedi. Sebebi aýǵan Úkimetiniń halyqaralyq esepshoty buǵattalǵan. Eger ekonomikalyq kollaps bolsa, onda bul tereń gýmanitarlyq baǵdarysqa alyp keledi. Al onyń belgili bir táýekelderi, syn-qaterleri bar. Eń aldymen dini ekstremizmdiń bas kóterýimen, esirtki tasymalynyń jáne bosqyndar leginiń artýymen bailanysty. Oǵan jol bermeý úshin búkil halyqaralyq qoǵamdastyq aýǵan halqyna gýmanitarlyq kómek kórsetýge úndep jatyr», - dedi ol.
Osy rette ol Qazaqstan aýǵan halqyna gýmanitarlyq kómek retinde 5 myń tonna un jiberý sheshimin qabyldaǵandyǵyn eske salyp ótti.
«Bul elmen saýda-ekonomikalyq bailanystardy da qalypyna keltirý qajet ekendigi sózsiz. Qazirgi ýaqytta bul elmen saiasi kelissózder ótkizý týraly sóz qozǵalyp otyrǵan joq. Sóz aýǵan halqyna kómek kórsetý jaiynda ǵana bolyp tur», - dedi Muhtar Tileýberdi.
