Qurǵaqshylyqqa bailanysty dándi daqyldar egisteriniń jai-kúii aitarlyqtai nasharlady. Bul týraly Úkimet otyrysynda QR Aýyl sharýashylyǵy ministriniń mindetin atqarýshy Erbol Qarashókeev málim etti, dep habarlaidy QazAqparat.
«Aǵymdaǵy jyly aýyl sharýashylyǵy daqyldarynyń jalpy egis alańy 23 mln gektardy qurady (bul 2020 jylmen salystyrǵanda 322 myń gektarǵa kóp). Dándi jáne dándi-burshaqty daqyldar 15,9 mln ga (onyń ishinde bidai – 12,9 mln. ga), maily daqyldar - 3,1 mln ga, kókónister men baqsha daqyldary jáne kartop - 473,8 myń ga, maqta - 109,7 myń ga, qant qyzylshasy - 21,7 myń ga, mal azyǵy daqyldary 3,2 mln ga alańda ornalasqan», - dedi Qarashókeev.
Onyń aitýynsha, egis naýqany sapaly tuqymdardy qoldana otyryp, ońtaily merzimde júrgizilgen. Fermerler tyńaitqyshtardy ýaqytynda qoldandy, egistikterde aramshópter men aýrýlarǵa qarsy himiialyq óńdeýdi der kezinde júrgizdi.
«Sonymen qatar, biylǵy jyly topyraqtaǵy jáne atmosferadaǵy qalyptan tys qurǵaqshylyqqa bailanysty dándi daqyldar egisteriniń jai-kúii aitarlyqtai nasharlady jáne bul Qazaqstanda ǵana bolyp jatqan jaǵdai emes. Egistikterdiń kúiiniń nasharlaý tendentsiiasy búkil álemniń astyq egetin kóptegen elderine áser etti. Mysaly, Amerika Qurama Shtattary Aýyl sharýashylyǵy ministrliginiń jáne Halyqaralyq astyq keńesiniń málimeti boiynsha Kanadada bidaidyń jalpy túsimi ótken jylmen salystyrǵanda 31,6%-ǵa, AQSh-ta 4,4%-ǵa, kórshiles Reseide 15%-ǵa tómendeýi múmkin», - dedi ministrdiń mindetin atqarýshy.
Oblystar ákimdikteriniń derekteri boiynsha búgingi tańda dándi daqyldar egistikteriniń jai-kúii bylai baǵalanýda:
- 13,2 mln gektarda nemese dándi daqyldardyń jalpy egis kóleminiń 85,2%-ynda jaqsy jáne qanaǵattanarlyq kúide;
- 2,1 mln gektarda nemese 13,7%-ynda nashar kúide;
- 178,3 myń gektarda nemese 1,1%-ynda egister joiylǵan.
