Qazaqstanda jeltoqsan nemese qańtar ailarynda qatań karantin sharalary engizilýi múmkin be? Búgin Ortalyq kommýnikatsiialar qyzmetinde ótken baspasóz máslihatynda bul suraq Densaýlyq saqtaý ministri Aleksei Tsoiǵa qoiyldy, dep habarlaidy "Ult aqparat".
«Sizder bilesizder, biz apta saiyn derekterdi taldap, aldaǵy kezeńderge de boljam jasaimyz. Qazirgi stsenarii boiynsha jeltoqsan-qańtar ailarynda karantin sharalary kúsheiýi múmkin ekenin kórip otyrmyz. Bári búgingi jaǵdaidy qalai baqylaýǵa alatynymyzǵa bailanysty. Qazir koronavirýs órshigen keibir óńirde juqtyrý deńgeii tómendep kele jatqanyn baiqap otyrmyz. Shyǵys Qazaqstanda máselen jaǵdai rettelip, juqtyrý deńgeiiniń tómendeý tendentsiiasyn baqylaýdamyz», - dedi Aleksei Tsoi.
Ministr áitse de, juqtyrý boiynsha ósim bolatynyn málim etti.
«Eń bastysy – jaǵdaidy baqylaýda ustaý. Qazir infektsiialyq aýrýhanalar 22 paiyzǵa, jansaqtaý tósekteri 17 paiyzǵa júktelgen. Iaǵni, rezerv bar. Sondyqtan qazir ýaiymdaýdyń qajeti joq. Bári baqylaýda», - dedi ol.
