Mádeniet jáne sport ministri Aqtoty Raiymqulova hel aldyndaǵy esebi kezinde «Qazaqfilm» aktsionerlik qoǵamyndaǵy jańǵyrtý jumystarynyń qalai júrip jatqany týraly málimet berdi, dep habarlaidy QazAqparat.
«2021 jyldan bastap Sháken Aimanov atyndaǵy «Qazaqfilm» aktsionerlik qoǵamynda jańǵyrtý jumysy bastaldy. Ol úsh jyl boiy jalǵasady. Joba kinostýdiiany tehnikalyq qaita jaraqtandyrýdy, injenerlik jeliler men ǵimarattarǵa kúrdeli jóndeý júrgizýdi, sondai-aq túsirilim alańyn salýdy jáne basqalardy kózdeidi. Atalǵan sharalar kinostýdiiany ózin-ózi tolyq qamtamasyz etýge jáne zamanaýi kino fabrikasy retinde jumys isteýge múmkindik beredi», - dedi Mádeniet jáne sport ministri halyqpen kezdesý barysynda.
Ol qazir pandemiiaǵa bailanysty shekteýlerdiń áserinen túsirilim protsesi toqtatylǵanyn eske saldy.
«Shekteýlerge qaramastan, 2020 jyly demeýshilik kómek esebinen nysanǵa kógildir otyn tartyldy. Bul shamamen 50 million teńgeni únemdeýge múmkindik berdi. 2020 jyldyń basynan búgingi kúnge deiin «Qazaqfilm» AQ 65 halyqaralyq kinofestivalge qatysyp, 32 syilyqqa ie bolǵan 27 film shyǵardy. Biyl 14 film jeti halyqaralyq kinofestivalge qatysty», - dedi Aqtoty Raiymqulova.
Mádeniet ministri Aqan Sataevtyń «Tomiris» filmi 2020 jyly L'Etrange Festival kinofestivalinde gran-pri alýyn otandyq kino indýsriianyń jetistigi dep atady.
«Táýelsiz Qazaqstan tarihynda tuńǵysh ret «Tomiris» filminde triýk oinaǵan Nomad Stunts kaskaderlik toby álemdik kaskaderler akademiiasynyń «Taýrýs» syilyǵyn aldy. TMD-daǵy Kann festivali syilyǵynyń jalǵyz iegeri qazaqstandyq aktrisa Samal Esliamova «NIKA» reseilik ulttyq kinojúldesinde «úzdik áiel róli» úshin marapatqa ie boldy», - dep qosty Aqtoty Raiymqulova.
