Búgin Qarjy ministri Erulan Jamaýbaev Túrkistan oblysynda bolyp, Qazaqstan-Ózbekstan shekarasyndaǵy keden beketteriniń jumysyn tekserdi, dep habarlaidy "Ult aqparat".
Sapar barysynda Ministr syrtqy ekonomikalyq qyzmet jáne keden mańy salasynyń qatysýshylarymen kezdesip, syrtqy saýda qyzmetin damytý máseleleri boiynsha keńes ótkizdi.
Óz sózinde Ministr Qazaqstan men Ózbekstan arasyndaǵy syrtqy saýda ainalymynyń qarqyndy ósýin, sondai-aq Ózbekstannan EAEO elderine taýarlar tranziti kóleminiń ulǵaiýyn atap ótti.
Sondai-aq, ol óńirdiń tranzittik-kóliktik áleýeti taýarlar ótkizý protsesterin jedeldetýge baǵyttalǵanyn jáne eki memlekettiń strategiialyq yntymaqtastyǵyn nyǵaitýǵa yqpal etetinin aitty.
Qarjy ministri Memleket basshysynyń kedendik ákimshilendirýdi jaqsartý jáne biýdjetke qosymsha kedendik tólemder men salyqtardy ulǵaitý boiynsha mindet qoiǵanyn eske saldy.
Jańa Qazaqstan halyqtyń ómir súrý sapasyn túbegeili jaqsartýdy jáne ulttyq tabysty durys bólýdi talap etedi. Osyǵan bailanysty keden jumysyndaǵy biznes-protsesterdi jaqsartý boiynsha naqty sharalar qabyldanatyn bolady.
Jalpy, ol memleket syrtqy ekonomikalyq qyzmetti júzege asyratyn kásipkerler úshin qolaily biznes-orta quryp jatqanyn atap ótti. Kedendik infraqurylym kezeń-kezeńimen jetildirilýde, ótkizý pýnktteri jańǵyrtylýda jáne baqylaý rásimderi men sharalaryn ortasha tsifrlandyrý júzege asyrylýda.
2021 jyldyń sáýir aiynda «B.Qonysbaev» atyndaǵy jańǵyrtylǵan ótkizý pýnkti paidalanýǵa berildi. 2024 jyldyń sońyna deiin «Qaplanbek», «Qazyǵurt» jáne «Atameken» ótkizý pýnktterin jańǵyrtý josparlanýda.
Aita keteiik, shekaradaǵy kólik aǵyny sońǵy 7 jylda turaqty ósip, 10 esege ulǵaidy.
2021 jylǵy taýar ainalymynyń kólemi 3,8 mlrd. AQSh dollaryn qurady, bul aldyńǵy jylmen salystyrǵanda 18%-ǵa artyq.
Memleketter aldynda ózara saýda deńgeiin 10 mlrd. AQSh dollaryna deiin ulǵaitý maqsaty tur.
