Sýretti Mańǵystaý oblysynyń Ekologiia departamenti baspasóz qyzmeti usyndy
Ekologiia, geologiia jáne tabiǵi resýrstar ministri Serikqali Brekeshev Kaspii teńizindegi itbalyqtardyń qyrylýyna qatysty pikir bildirdi, - dep habarlaidy Tengrinews.kz.
Kaspii jaǵalaýynda 100-ge jýyq itbalyq óleksesi tabyldy, dedi ministr Úkimet otyrysynan keiingi brifingte.
Onyń aitýynsha, ólekse qatty ydyrap ketkendikten, ólim sebebin bir aiǵa jýyq ýaqyttan keiin anyqtaýǵa bolady. Mamandar tyrnaqtar men tisterdiń úlgisin alǵan.
"Kópshilik itbalyqtardyń ólimi men NCOC kompaniiasynyń Soltústik Kaspiidegi teńiz túbin tereńdetý jumystary qanshalyqty bailanysty degen máseleni kóterdi. Itbalyqtardyń ólimine bailanysty mamandar oqiǵa 3-4 ai buryn bolýy múmkin deidi. Bul qys mezgili, áli muz erimegen kez. Sondyqtan ólekse saqtalǵan. Olar muzda boldy. Muz erigennen keiin, maidyń áserinen qalqyp, jel jaǵaǵa shyǵarǵan.
Ólekseler Qashaǵannan 150 shaqyrym qashyqtan tabylǵan. Is-shara jospary boiynsha qazba jumystary 15 sáýirde ǵana bastaldy. Bul oqiǵalar bir-birine qatysty emes", - dep sendirdi ministr.
Onyń aitýynsha, bul jumysty bastamas buryn kompaniia ǵalymdarmen birneshe is-shara ótkizgen. Jumys Soltústik Kaspii florasyna da, faýnasyna da áser etpeitini týraly ǵylymi negizdemeler bolǵan.
Eske salaiyq, 27 sáýirde Kaspii teńiziniń Mańǵystaý bóligindegi jaǵalaýynda 94 itbalyq óli tabylǵan bolatyn.
