Parlament Májilisindegi Úkimet saǵatynda Ishki ister ministri Qalmuhanbet Qasymov biyl elimizdegi saýda oryndaryn tekserýden keiin 1,2 myń adam jaýapkershilikke tartylǵanyn aitty, dep habarlaidy QazAqparat.
«Reseidegi Kemerovodaǵy oqiǵadan keiin biz elimiz boiynsha saýda ortalyqtarynda tekserý júrgizdik. Úsh aidyń ishinde 1 240 saýda nysany tekserýmen qamtylyp, olarda 15 myńnan astam ereje buzýshylyq anyqtaldy. Ákimshilik jaýapkershilikke 1 220 adam tartylyp, olarǵa 19 mln teńgeden astam somaǵa aiyppul salyndy», - dedi ministr.
Osy oraida ol tek 23 nysanda qaýipsizdik jaǵdaiy laiyqty deńgeide qamtamasyz etilgendigin atap ótti.
«Berilgen nusqaýlar aiasynda 776 nysan boiynsha kemshilikter tolyqtai joiyldy. Al órt qaýipsizdigi talaptaryn oryndamaǵan 138 nysanǵa qatysty material sotqa joldandy», - dedi Q. Qasymov.
Eske salaiyq, biyl 25 naýryzda Kemerovoda «Zimniaia vishnia» saýda oiyn-saýyq ortalyǵy órtke oranǵan edi. Qaiǵyly oqiǵa saldarynan 60 adam qaza tapty. Olardyń qatarynda 40 bala bolǵan.
