پارلامەنت مەجٸلٸسٸندەگٸ ٷكٸمەت ساعاتىندا ٸشكٸ ٸستەر مينيسترٸ قالمۇحانبەت قاسىموۆ بيىل ەلٸمٸزدەگٸ ساۋدا ورىندارىن تەكسەرۋدەن كەيٸن 1,2 مىڭ ادام جاۋاپكەرشٸلٸككە تارتىلعانىن ايتتى, دەپ حابارلايدى قازاقپارات.
«رەسەيدەگٸ كەمەروۆوداعى وقيعادان كەيٸن بٸز ەلٸمٸز بويىنشا ساۋدا ورتالىقتارىندا تەكسەرۋ جٷرگٸزدٸك. ٷش ايدىڭ ٸشٸندە 1 240 ساۋدا نىسانى تەكسەرۋمەن قامتىلىپ, ولاردا 15 مىڭنان استام ەرەجە بۇزۋشىلىق انىقتالدى. ەكٸمشٸلٸك جاۋاپكەرشٸلٸككە 1 220 ادام تارتىلىپ, ولارعا 19 ملن تەڭگەدەن استام سوماعا ايىپپۇل سالىندى», - دەدٸ مينيستر.
وسى ورايدا ول تەك 23 نىساندا قاۋٸپسٸزدٸك جاعدايى لايىقتى دەڭگەيدە قامتاماسىز ەتٸلگەندٸگٸن اتاپ ٶتتٸ.
«بەرٸلگەن نۇسقاۋلار اياسىندا 776 نىسان بويىنشا كەمشٸلٸكتەر تولىقتاي جويىلدى. ال ٶرت قاۋٸپسٸزدٸگٸ تالاپتارىن ورىنداماعان 138 نىسانعا قاتىستى ماتەريال سوتقا جولداندى», - دەدٸ ق. قاسىموۆ.
ەسكە سالايىق, بيىل 25 ناۋرىزدا كەمەروۆودا «زيمنيايا ۆيشنيا» ساۋدا ويىن-ساۋىق ورتالىعى ٶرتكە ورانعان ەدٸ. قايعىلى وقيعا سالدارىنان 60 ادام قازا تاپتى. ولاردىڭ قاتارىندا 40 بالا بولعان.
