Qorǵanys ministri Nurlan Ermekbaev Búkilqazaqstandyq qoian-qoltyq urys qaýymdastyǵynyń prezidenti bolyp sailandy, dep habarlaidy QazAqparat tilshisi.
Belgili bolǵandai, Búkilqazaqstandyq qoian-qoltyq aiqas qaýymdastyǵynyń prezidentin qaita sailaý - QR Mádeniet jáne sport ministri Arystanbek Muhamediulynyń bastamasy. Atalǵan bastamaǵa qoldaý bildirgen qaýymdastyqtyń basqa músheleri biraýyzdan Nurlan Ermekbaevqa daýys berdi. Búgin Astanada ótken jiynǵa Arystanbek Muhamediulymen birge atalmysh qaýymdastyqtyń burynǵy prezidenti Amantai Kúrenbekov te qatysty.
«Búkilqazaqstandyq qoian-qoltyq urys qaýymdastyǵyn basqarýǵa senim bildirgenderińiz úshin shyn júrekten alǵys aitqym keledi. Qoian-qoltyq urys - óte mańyzdy sport. Qazaqstan Respýblikasynyń Prezidenti, QR Qarýly Kúshteriniń Joǵarǵy Bas Qolbasshysy Qazaqstan halqyna Joldaýynda «Sportpen shuǵyldaný, dene shynyqtyrýmen ainalysý - ómirdiń ár salasynda túrli qiyndyqtardy jeńe bilýge, jeńiske jeteleitinin» aitty. Osyǵan bailanysty armiia úshin, Qarýly Kúshter úshin sporttyń qoldanbaly túriniń mańyzy erekshe. Biz osyndai jumysty jalǵastyramyz degen oidamyn. Qaýymdastyq birneshe jyl boiy jumys istep, osy merzim ishinde jaqsy jetistikterge qol jetkizdi», - degen Nurlan Ermekbaev Amantai Kúrenbekovtyń arqasyna shapan japty.
Óz kezeginde Arystanbek Muhamediuly Memleket basshysy árdaiym salaýatty ómir saltyna, onyń ishinde sport salasyna mańyz beretinin atap ótti.
«Qazirgi kezde Qarýly kúshterdiń deńgeii aitarlyqtai kóterilgenin kórip otyrmyz. Qazaqstan sportshylary qandai jarystar bolmasyn, joǵary kórsetkishterge qol jetkizip jatyr. Men, álbette, barlyq sport birlestikteriniń atynan Nurlan Baizaqulyn qaýymdastyq prezidenti bolyp sailanýymen quttyqtaimyn. Nurlan Baizaquly - ózi de keremet sportshy, kóptegen saiystardyń jeńimpazy, 1988 jyly sport sheberligine úmitker atanǵan. Qaýymdastyqtyń damýyna jańa kókjiekter ashylǵanyna senimdimin», - degen Arystanbek Muhamediuly Amantai Kúrenbekovke Alǵys hat tabys etti.
