QR Ishki ister ministri Qalmuhanbet Qasymov Almatyda politsiia qyzmetkeriniń áriptesiniń qolynan qaza tabýy oqiǵasyna qatysty pikir bildirdi, dep habarlaidy QazAqparat tilshisi.
Ministr tabeldik qarýdan jaralanǵan politsei keshe, 26 qyrkúiek kúni kóz jumǵanyn jáne adam óltirý faktisi ózara janjal kezinde oryn alǵanyn naqtylady.
«Kúdikti kezekshilikke kelip, qarýdy qabyldaǵan. Keiin garajǵa avtokólikti alýǵa shyqqan kezde, ol týysqanymen, iaǵni ápkesiniń kúieýimen jolyqqan. Ápkesiniń ortaq nekeden úsh balasy bar», - dedi Senattyń plenarlyq otyrysynan keiin tilshiler saýalyna jaýap bergen Q. Qasymov.
Belgili bolǵandai, kóz jumǵan qyzmetker kezekshiligin tapsyrýǵa kelgen. «Sońǵy alty ai merzimde ol otbasymen birge turmaǵan kórinedi. Keshqurym qyzmetkerler kezdesip qalǵan kezde janjal týyndap, sonyń saldarynan birinshisi qarýdan oq atqan», - dep naqtylady vedomstvo basshysy.
Ministrdiń aitýynsha, atalǵan fakti boiynsha qylmystyq is qozǵaldy.
Eske salaiyq, keshe, 26 qyrkúiek kúni Almatyda jergilikti politsiia inspektory áriptesin qarýdan jaraqattaǵan bolatyn.
Keiin qos politsiia qyzmetkeri jaqyn týysqandar ekeni anyqtaldy.
Jaraqat alǵan tártip saqshysy sol kúni, túngi saǵat 22.00-de aýrýhanada kóz jumdy.
