QR Qorǵanys ministri Nurlan Ermekbaevtyń Almaty garnizonyna jumys sapary barysynda Desanttyq-shabýyldaý áskerleriniń brigadasy dabyl boiynsha kóterildi, dep habarlaidy "Ult aqparat".
Vedomstvo aqparatyna sáikes, áskeri bólim jaýyngerlik daiarlyqqa keltirilgen tańǵy saǵat 5.30-da jeke quramnyń is-qimyly, jaýyngerlik tehnikanyń belgilengen aýmaqqa ýaqytyly shyǵýy, brigada komandiriniń tapsyrmalardy qoiýy, sonymen qatar bólimsheniń úilesimdi áreketi tekserildi. Atalǵan is-sharany pysyqtaý barysynda qorǵanys ministri ofitserlerdiń birine jeke quramnyń qaýipsizdik sharalaryn qadaǵalamaǵany úshin sógis jariialady.
Sonymen qatar Almaty garnizonynda áýe shabýylyna qarsy qorǵanysynyń jeke bailanys polki men brigadasynyń nysandary tekserildi. Kóbine bailanys tehnikalary men avtokólik tehnikalary, bólimniń qoimalary men basqa da nysandary, sonymen qatar komandalyq pýnktterde jaýyngerlik kezekshiliktiń uiymdastyrylýy nazarda boldy.
Arnaiy maqsattaǵy áskeri bólimge polkovnik Boris Kerimbaevtiń esimi berilgeni jáne onyń qurmetine eskertkish taqtanyń ashylýy jumys saparynyń mańyzdy bóligi boldy. Saltanatty sharada áskeri bólimge Boris Kerimbaevtiń esimi berilgeni áskeri qyzmetshilerge júktelgen erekshe mindetter kezinde jaýapkershilikti sezinýge yntalandyrý, sondai-aq áskeri qyzmetshilerdiń ártúrli býynyn boryshqa, áskeri ar-namys zańdaryna, jaýyngerlik baýyrlastyq pen halyqqa qyzmet etýdiń berik aiǵaǵy bolyp tabylatyny aityldy. Sharaǵa bólimniń jeke quramy men basshylyǵy, Qarýly Kúshterdiń ardagerleri jáne de polkovnik Kerimbaevtiń jubaiy qatysty.
«Búgin meniń qýanyshymda shek joq. Árine joqtyń orny tolmas. Ol osy jerde sapta turǵan barlyǵy úshin naǵyz ustaz bola bildi. Men barlyqtaryńyzǵa myqty densaýlyq, otbasylaryńyzǵa amandyq tileimin. Joǵary jetistikterińizben quttyqtaimyn», - dedi Raisa Kerimbaeva.
