QR IIM basshysy Qalmuhambet Qasymov Denis Ten ólimin qatysy bar degen kúdiktilerdiń qalai ustalǵanyn aityp berdi, dep habarlaidy QazAqparat tilshisi.
«Almatydaǵy jaǵdaidy qalypqa keltirý úshin barynsha jaǵdai jasalyp jatyr. Politsiia oqiǵa ornyna der kezinde shyqqan. Men bul jerde qylmysty qalai ashqanymyz týraly aityp otyrmyn. Qylmys saǵat 14:56-da bolsa, sol kúni keshki saǵat 23:30-te biz kúdiktilerdiń bireýin ustadyq»,- dedi ministr Almatyda Qazaqstan Respýblikasy men Resei Federatsiiasy ishki ister ministrligi áriptestiginiń tórtinshi otyrysy boiynsha ótken brifingte.
Onyń aitýynsha, birinshi ustalǵan kúdikti arqyly onyń sybailasy da ustalǵan.
«Úshinshi kúdiktini ustaǵan kezde qiyndyq týdy. Qylmys bolǵan kúni túnde ol úiinde bolǵan. Odan keiin mekenjaiyn aýystyryp jiberedi. Aqsai aýdanynda ulttyq gvardiianyń qatysýymen operatsiia uiymdastyrýǵa týra keldi. Ol kelesi mekenjaiǵa aýysar kezde ustaldy», - dedi ministr.
Eske sala ketsek, qazaqstandyq mánerlep syrǵanaýshy Denis Ten 19 shilde kúni Almatyda avtokólik urylarynyń qolynan qaza tapty. Oqiǵa túski úshter shamasynda bolǵan. Sportshy turaqta turǵan kóliginiń ainasyn urlamaq bolǵan eki adamnyń ústinen túsedi. Arada janjal bastalyp, saldarynan Denis Ten pyshaq jaraqatyn alady.
Úsh litr qan joǵaltqan sportshy keshki bes jarymda aýrýhanada kóz jumdy.
Atalǵan faktige qatysty qylmystyq is qozǵaldy. Sportshynyń ólimine qatysy bar degen kúdikpen úsh azamat ustaldy. Olar Jambyl oblysynyń týmasy 24 jastaǵy Nuraly Qiiasov, Qyzylorda oblysynyń 1994 jylǵy týmasy Arman Qudaibergenov jáne Janar Tolybaeva. Áiel qylmys jasalǵanyn habarlamaǵany úshin ustaldy.
