Serikqali Brekeshev. Foto: gov.kz
Ekologiia, geologiia jáne tabiǵi resýrstar ministri Serikqali Brekeshev sybailas jemqorlyqqa qatysy bar degen kúdikpen qamaýǵa alynǵan orynbasary Ahmetjan Pirimqulovtyń kinási dáleldense, otstavkaǵa ketýi múmkin, - dep habarlaidy Tengrinews.kz.
Úkimette ótken brifingte jýrnalister ministrden jemqorlyqqa qatysty daýdyń ortasynda qalǵan alty qoqys óńdeitin zaýyt týraly surady.
"Jaqynda sybailas jemqorlyqqa qarsy qyzmet "ÓKM operatory" arqyly osy kompaniialar basshylary men Ekologiia ministrliginiń jaýapty tulǵalary 180 milliard teńgeni jymqyrmaq bolǵanyn habarlady. Onyń ústine olar bul aqshany 6 qoqys jaǵý zaýytyn salý arqyly jymqyrýdy kózdegen. Olar salyndy ma jáne áńgime qai áriptesterińiz týraly", - dep surady tilshi.
Brekeshevtiń aitýynsha, tenderdi jeńip alǵan merdiger bul jobany odan ári júrgizýge nietti emes. Sondyqtan zaýyttar taǵdyry qaita qarastyrylady.
"Olar bul qarajatty jymqyrǵysy keldi me, álde alyp ketkisi keldi me, bul tergeý sharalary nátijesinde belgili bolady. (...) Men otstavkaǵa ketem be degen suraq qoiǵyńyz keldi. Sot sheshimi bolsa, men qoldanystaǵy zańnamaǵa sáikes áreket etemin", - dedi Brekeshev.
Eske salaiyq, qańtarda ekologiia, geologiia jáne tabiǵi resýrstar vitse-ministri Ahmetjan Pirimqulov "ÓKM operatory" tóraǵasy Medet Qumarǵalievpen birge ustalǵany belgili boldy. Olar sybailas jemqorlyq qylmystaryn jasady degen kúdikke ilingen.
