Jol qurylysy men jóndeý jumystarynyń qunyna áser etetin bitým óndirý jospary 96 paiyz ǵana oryndalǵan. Energetika ministri Maǵzum Myrzaǵaliev Úkimet otyrysynda osynyń sebebin túsindirdi, dep habarlaidy QazAqparat.
«Áýe otyny boiynsha kórsetkish 100 paiyz oryndaldy. Mazýt óndirisi jospardan 13 paiyz artyq. Sonymen qatar, esepti kezeńde 682 myń tonna bitým óndirildi. Bul - 8 aiǵa josparlanǵan kórsetkishtiń 96 paiyzyna teń. Bitým kóleminiń tómendeýiniń birden-bir sebebi – biyl qysta halyq tarapynan gaz tutynýdyń ulǵaiýy. Osyǵan bailanysty «Gazpromneft – Bitým» kompaniiasyna gaz berý shektelgen bolatyn», - dedi Maǵzum Myrzaǵaliev.
Ministrdiń sózine sensek, munai-gaz-himiia ónimderiniń kólemi 96 myń tonna bolyp, jospar 100 paiyz oryndalǵan.
Sondai-aq, elektr energiiasyn óndirý jospary da tolyq iske asyp, 75,1 mlrd KVt/saǵatqa jetken.
Maǵzum Myrzaǵaliev Úkimet otyrysynda El aýmaǵynan avtomobilmen benzin áketýge salynǵan tyiym taǵy 6 aiǵa uzartylýy múmkin ekenin aitty.
«Ishki naryqty dizel otynymen turaqty qamtamasyz etý úshin Pavlodar munai-himiia zaýytyndaǵy jóndeý jumystarynyń merzimin aýystyrý nemese qysqartý máselesi qazir pysyqtalýda. Buǵan qosa benzindi, dizel otyny men munai ónimderiniń jekelegen túrlerin Qazaqstan aýmaǵynan avtomobilmen áketýge 6 ai merzimge tyiym salýdy kózdeitin buiryqty taǵy jarty jylǵa sozý máselesi pysyqtalyp jatyr», - dedi ministr.
