Parlament Májilisiniń jalpy otyrysynda «QR Úkimeti men RF Úkimeti arasyndaǵy «Baiqońyr» keshenin gazben jabdyqtaý týraly kelisimdi ratifikatsiialaý týraly» zań jobasy maquldandy, dep habarlaidy QazAqparat.
«Baiqońyr» keshenin gazben jabdyqtaý týraly kelisim 2019 jylǵy sáýirde jasaldy.
«Kelisim «Baiqońyr» keshenin gazben qamtamasyz etýdiń quqyqtyq negizderin aiqyndaýǵa baǵyttalǵan jáne tutynýshylardy suiytylǵan munai gazynan tabiǵi gazǵa kóshirýdi kózdeidi. Buǵan deiin Baiqońyr qalasyn gazben, iaǵni suiytylǵan munai gazy nemese propan-býtanmen jabdyqtaý úshin reseilik «Gazovoe hoziaistvo» kásiporny jaýapty bolǵan», - dedi QR Energetika ministri Nurlan Noǵaev.
Baiqońyr qalasy ákimshiliginiń aqparaty boiynsha suiytylǵan munai gazynyń baǵasy bir kelisine 349 teńge. Al tekshe metrge shaqqanda 714 teńgeni qurady.
«Úkimetaralyq kelisimge sáikes, «QazTransGaz Aimaq» AQ-ǵa qala aýmaǵynda jáne «Baiqońyr» ǵarysh ailaǵynda tabiǵi gazdy ótkizý quqyǵy beriledi. Osy qyzmet reseilik salyq organdarynda tirkelmei júzege asyrylady. Bul qosarlanǵan salyq salýǵa jol bermeidi. Kelisimde Baiqońyr qalasynyń aýmaǵynda tabiǵi gazdy bólshek saýdada ótkizý baǵasy Qyzylorda oblysynyń gaz tutynýshylary úshin Qazaqstannyń monopoliiaǵa qarsy organy belgileitin baǵaǵa sáikes kelýi tiis dep bekitilgen», - dedi ministr.
Onyń aitýynsha, búginde Baiqońyr qalasy jáne Qyzylorda oblysyndaǵy tabiǵi gazdyń bólshek baǵasy turǵyndar úshin bir tekshe metrge 18,6 teńgeni, zańdy tulǵalar jáne biýdjettik uiymdar úshin bir tekshe metri 18,9 teńgeni qurady, iaǵni qosymsha qun salyǵyn eseptemegende.
«Baiqońyr qalasynda tamaq ázirleý úshin bir páter ortasha eseppen 3-4 tekshe metr suiytylǵan gazyn nemese shamamen 6-10 tekshe tabiǵi gazdy tutynady. Tabiǵi gazdy qosqan jaǵdaida, turǵyndar osy kólemdegi gaz tutynǵany úshin 111-186 teńge tóleidi. Bul suiytylǵan munai gazynan 16 ese arzan. «QazTransGaz Aimaq» AQ men «Gazovoe hoziaistvo» kásipornynyń birlesken jumysynyń nátijeleri boiynsha qazirgi ýaqytta Baiqońyr qalasynyń barlyq kópqabatty sektory, iaǵni 328 turǵyn úi, sondai-aq 150 jeke úidiń 45-i tabiǵi gazǵa qosylǵan», - dedi N. Noǵaev.
Osy kelisim turǵyndar úshin kommýnaldyq qyzmet shyǵyndaryn azaitýǵa múmkindik beredi. Sebebi suiytylǵan gazǵa qaraǵanda, tabiǵi gazdyń quny aitarlyqtai arzan. Budan basqa, Baiqońyr qalasynda gazdy bólý infraqurylymy salystyrmaly túrde jańa bolyp esepteledi.
