Qoǵamdyq damý ministri Darhan Káletaev Qazaqstannyń Azamattyq aliansynyń mártebesin kóterý týraly aitty, dep habarlaidy QazAqparat tilshisi.
«Bizde «Atameken» UKP-ǵa uqsas jolmen Qazaqstannyń Azamattyq aliansynyń mártebesin kóterý mindeti tur. Sonda ol uiym jumys istep turǵan Úkimettik emes uiymdardyń birshama bóligin ózine qarata alar edi. Azamattyq alianstyń ózindik granttyq baǵdarlamasy bolýy tiis. Sonymen birge, ÚEU akademiiasyn qurý kózdelip otyr. Tek joǵaryda atalǵan ideialardy tájiribege engizgen jaǵdaida ǵana úkimettik emes uiymdarǵa memlekettik qyzmetterdiń bir bóligin tabystaý múmkindigi týady», - dedi Darhan Káletaev Elbasy Nursultan Nazarbaevtyń qatysýymen ótip jatqan VIII Azamattyq forýmda.
Sonymen qatar, Qoǵamdyq damý ministri Memleket basshysynyń kúni keshe jariialanǵan «Uly dalanyń jeti qyry» maqalasynda kóterilgen máseleler halyqtyń, sonyń ishinde azamattyq qoǵam ókilderiniń tarapynan zor qoldaý taýyp otyrǵanyn atap ótti.
«Uly dalanyń jeti qyry» - halqymyzdyń rýhyn kóterip, ulttyq sana-sezimin jańǵyrtýdyń uly bastamasy bolyp otyr. Elbasy aitqandai, «ótkendi maqtan tutyp, búgindi baǵalaý, jarqyn bolashaqqa umtylý - elimizdiń tabysty bolýynyń kepili». Osy mańyzdy is-sharalardyń basynda belsendi qoǵam ókilderi turýy qajet dep sanaimyn. Búgingi forýmnyń negizgi maqsaty osy», - dedi Darhan Káletaev.
Aita ketsek, elordadaǵy Táýelsizdik saraiynda Elbasy Nursultan Nazarbaevtyń qatysýymen VIII Azamattyq forým ótip jatyr.
