Densaýlyq saqtaý ministri Ajar Ǵiniiat aýyldardaǵy densaýlyq saqtaý salasyn damytýǵa qansha qarajat jumsaýdy josparlap otyrǵanyn aitty, - dep habarlaidy Tengrinews.kz agenttigi.
"Biz aldyn ala esepteý júrgizdik. Pilottyq ulttyq jobany iske asyrý quny, aldyn ala esepteýler boiynsha, 200 milliard teńgeden asady. Onyń 126 milliard teńgesi aýyldyń densaýlyq saqtaý salasynyń qurylysyna jumsalady", - dedi Ǵiniiat.
Mindetti áleýmettik meditsinalyq saqtandyrýdy úilestirý departamentiniń direktory Gúljan Shaihybekova basqa da shyǵyndardy, sonyń ishinde aýyl turǵyndaryna meditsinalyq kómek kórsetiletinin aitty.
"Aýyldyq densaýlyq saqtaý shyǵyndary alǵashqy meditsinalyq-sanitarlyq kómek shyǵyndaryna kiredi. Búgingi kúni 460 milliard teńge josparlanyp otyr, onyń 40 paiyzy aýylǵa jiberiledi. Sondai-aq mindetti áleýmettik meditsinalyq saqtandyrý aiasynda aýyldyq aýrýhanalar shyǵyndarǵa qarastyrylǵan. Al tegin meditsinalyq kómektiń kepildendirilgen kólemi shamamen 300 milliard teńge", - dep tolyqtyrdy ol.
