QR Qorǵanys ministri Nurlan Ermekbaev oq-dáriler saqtalyp kelgen Arystaǵy áskeri bólim týraly aityp berdi, dep habarlaidy "Ult aqparat".
«Arysta taǵy eki áskeri bólim bar, olar qyzmetin jalǵastyrýy múmkin. Óitkeni, eshbir qaýip tóndirip turǵan joq jáne onda oq-dáriler saqtalmaidy. Elbasy men Prezidenttiń tapsyrmasy boiynsha endi Arysta oq-dáriler saqtalmaidy. Basym bóligi qazirgi tańda joiyldy. Al qalǵany Qazaqstan aýmaǵyndaǵy basqa qoimalarǵa jetkiziledi. Arys bul arsenaldan tolyǵymen aryldy deýge bolady», - dedi QR Qorǵanys ministri.
Ol sondai-aq oq-dáriler Qazaqstannyń qai óńirlerinde saqtalatynyn atap ótti.
«Normalar qaita qaralady. Olar eldi mekenderden shalǵai ornalasqan jerde saqtalatyn bolady. Jergilikti atqarýshy basqarmalarǵa eldi mekender qoimalarǵa jáne arsenaldarǵa jaqyn bolmaýyn qadaǵalaýdy tapsyramyz», - dedi ministr.
«Qarý saqtaityn qoimanyń qurylysy kezinde qashyqtyq normativteri saqtalady. Bul qoima (Arystaǵy - avt.) 1930 jyly salynǵan. Ol kezde bul jerde qala bolmaǵan. Aýyl alys jerde ornalasqan. Alaida, sol ýaqyttan beri eldi meken qarý saqtaityn qoimanyń qaqpasyna jaqyndap qaldy. Bul - durys emes. Endi mundai bolmaidy», - dedi vedomstvo basshysy.
Onyń aitýynsha, qazir jarylys sebebin anyqtaý jáne tergeý jumystary júrip jatyr.
«Barlyq nusqalardy qarap jatyrmyz. Naqty aitý qiyn. Degenmen, birinshi kúni-aq men ózim bólim komandirimen jáne arsenal bastyǵymen birge qoimanyń ishine kirdik, barlyq beinejazbalardy aldyq. Qazir tergeý toby bul jazbalardy tekserip jatyr. Tergeý júrgiziledi. Óz mindetterin durys oryndamaǵan nemese qatelikke boi aldyrǵan laýazymdy tulǵalardyń kinási anyqtalyp, qatań jazaǵa tartylady. Biraq búgingi tańda erejeni buzý sipattaryn kórip otyrǵan joqpyz», - dep túsindirdi Nurlan Ermekbaev.
Ministrdiń atap ótýinshe, Arystaǵy arsenal tehnikalyq turǵydan eń jaqsy jaraqtandyrylǵan.
«Oqiǵanyń sebebi ártúrli bolýy múmkin: elektr jelisiniń tuiyqtalýy, jarylǵysh zattaǵy himiialyq reaktsiia, diversiia, basqa zattyń túsip ketýi, shóptiń órtenýi. Ne degenmen, Arystaǵy arsenal tehnikalyq turǵydan eń jaqsy jaraqtandyrylǵan edi. Qaýipsizdik sharalary qatań saqtaldy. Ótken jyly jańa júie, tehnikalyq qurylǵylar, kúzetpen qamtamasyz etilgen. Syrtqy perimetri men arsenaldyń ishki jaǵdaiyna qatysty barlyq aqparat kelip túsetin serverdi basqarý pýlti boldy. Qoimaǵa kirý shektelgen. Iaǵni, munda barlyq qaýipsizdik sharalary saqtalǵan. Sońǵy birneshe jylda qoimadan 30 myń tonnadan astam oq-dári shyǵaryldy», - dedi Nurlan Ermekbaev.
Qorǵanys ministri jýrnalisterdiń suraqtaryna jaýap bere otyryp, zalaldyń aýqymyn baǵalady. Onyń aitýynsha, jarylǵan snariadtar arzan turmaidy.
