Eńbek jáne halyqty áleýmettik qorǵaý ministri Birjan Nurymbetov balalarymen úide otyrýǵa májbúr ata-analarǵa demalys berý tártibi qalai iske asatynyn túsindirdi, – dep habarlaidy Tengrinews.kz.
Ministrdiń aitýynsha, Eńbek kodeksi boiynsha kez kelgen jumys istep júrgen azamat jylyna bir ret aqyly eńbek demalysyna shyǵýǵa múmkindigi baryn aitty.
"Ol úshin ár mekemede keste jasalady. Sol demalys keste boiynsha nemese kesteden tys berilýi múmkin. Osy jaǵdaida bizdiń jumys berýshilerge aitatynymyz, balasyna qaraýǵa májbúr bolǵan jumysshylarǵa sol jylyna beriletin eńbek demalysyn osy kúnderi berýdi suranamyz", - dedi Birjan Nurymbetov.
Ministr aqyly demalys kezinde keminde ortasha jalaqysy sol jumysshyǵa tólenetinin aitty.
"Biraq óz kezeginde jumys berýshi jumysshydan ekinshi ata-ana nemese basqa qamqorshylary osyndai demalysqa shyqpaǵany týraly nemese januiada jumyssyz júrgen azamattar joq ekeni týraly anyqtama talap etýge de quqyǵy bar", - deidi ministr.
Birjan Nurymbetov osy jaǵdaidyń bárin iske asyra almai, tek qysqartýǵa májbúr bolatyn jaǵdaida ne bolatynyn túsindirdi.
"Eńbek zańy boiynsha jumys berýshi jumysshyny qysqartatyn bolsa bir ai buryn jumysshyny eskertýi mindetti jáne qysqartylǵan jaǵdaida bir ailyq kóleminde ótemaqy tóleýi kerek. Biz óz kezegimizde kásiporyndardyń jumysshylardy qysqartýy múmkindigine monitoring júrgizip otyramyz", - dep túsindirdi eńbek jáne halyqty áleýmettik qorǵaý ministri.
Buǵan deiin Prezident Qasym-Jomart Toqaevtyń basshylyǵymen úkimet jáne memlekettik organdardyń basshylary qatysqan jedel áreket etý Shtabynyń jinalysy ótip, jumys berýshiler balasy bar qazaqstandyqtardy aqyly demalysqa jiberý týraly máseleni qarastyrýy keregin aitqan edi.
Eske salaiyq, Densaýlyq saqtaý ministrliginiń ókilderi Qazaqstanda 16 naýryzdaǵy koronavirýs boiynsha jaǵdaidy aityp bergen edi. Ministrlik málimetinshe, Qazaqstanda búginge deiin 9 adam koronavirýs juqtyrǵan. Olardyń jeteýi Almatyda, al qalǵandary Nur-Sultanda. Al taǵy bir qazaqstandyq Germaniiada.
Sondai-aq, 1641 adam karantinde bolsa, 981 adam úide karantinge jatqyzyldy.
