Eńbek jáne halyqty áleýmettik qorǵaý ministri Madina Ábilqasymova bloger Denis Krivosheevke suhbat berip, elordada shatyry joq lashyq ishinde órtenip ketken bes birei qyzdyń ólimine qatysty pikir bildirdi, dep habarlaidy nur.kz azamattyń Telegram arnasyna silteme jasap.
«Bul jantúrshigerlik oqiǵa jáne tek sol otbasynyń ǵana emes, bizdiń elimizdegi árbir januianyń basyna túsken aýyr qaiǵy. Barsha jaqyndaryna qaiǵyra kóńil aitamyn. Men ana retinde munyń adam tózgisiz jaǵdai ekenin jáne orny tolmas qaza ekenin túsinemin. Alla olarǵa kúsh-qat bersin», — dedi ministr hanym.
Sonymen birge, Madina Ábilqasymova «Kúlli eldiń qabyrǵasyn qaiystyrǵan jaǵdaidan qandai sabaq alyndy?», — degen suraqqa jaýap berdi.
Ol ózine qarasty ministrlik memleket tarapynan kópbalaly jáne jaǵdaiy tómen otbasylarǵa kórsetiletin arnaiy qoldaý sharalarynyń sapasyn jaqsartý úshin jumys isteitinin alǵa tartty.
«Aldaǵy ýaqytta bizdiń vedomstvo jergilikti atqarý organdarymen júzege asatyn áleýmettik kómek boiynsha qosymsha is-sharalar usynatyn bolady. Barlyq az qamtylǵan otbasylar anyqtalyp, olarǵa kóńil bólinedi», — dep ýáde etti ministr.
Ábilqasymovanyń sózderinshe, kúni keshe ol oqiǵa ornyna baryp, órt saldarynan zardap shekken januia men onyń týystarymen kezdesken. Sondai-aq, ol ministrlik qyzmetkerleri barynsha kómek kórsetkenin jetkizdi.
