Eńbek jáne halyqty áleýmettik qorǵaý ministri Birjan Nurymbetov AÁK alyp otyrǵan otbasynyń eńbekke jaramdy múshesine yńǵaily ári mamandyǵyna sai jumys usynylatynyn málimdedi, dep habarlaidy QazAqparat.
«AÁK boiynsha negizgi ózgeristerdiń birinshisi – kópbalaly januialarǵa bólek járdemaqy taǵaiyndaldy. Munyń sebebi – AÁK alyp júrgen otbasylardyń basym bóliginde balalar – kópbalaly januialardan. Sondyqtan, olarǵa AÁK-tiń bir bóligin bólek járdemaqy retinde shyǵarýdy jón kórdik. Bul, tabysyna qaramastan tólenetin járdemaqy. Ol balanyń sanyna qarai saralanyp, mólsheri bekitiledi. Ol ai saiyn respýblikalyq biýdjetten tólenedi. Osy jylǵa bul baǵytta 177 mlrd teńge qarastyryldy», - dedi búgin ministr Ortalyq kommýnikatsiialar qyzmetinde ótken baspasóz máslihatynda.
Birjan Nurymbetov 367 myń januiaǵa osy járdemaqy taǵaiyndalǵanyn málim etti.
«Ataýly áleýmettik kómek endi osy jyldan bastap toqsan saiyn taǵaiyndalyp, tólenetin bolady. Osyǵan qarai jańa jyldan bastap otbasylardan ótishin qabyldaý ústindemiz. Biz jeltoqsan aiynda qarasha aiyna tiisti AÁK-ti jáne jeltoqsanǵa tiisti tólemdi aýdardyq. Endi azamattar qańtar aiynda qujattaryn ótkizip, aqpan aiynda ala bastaidy. Bul jerde taǵy bir ózgeris: eger AÁK alatyn januiada eńbekke jaramdy adamdar bolsa, olardy jumysqa tartamyz. Eger ol usynylǵan jumystan bas tartatyn bolsa, ókinishke qarai búkil januiaǵa beriletin AÁK toqtatylady. Bul jerde eskere ketetin jait: mamandar kez kelgen jumysty usynbaidy. Bizde jumyspen qamtýdyń tártibi bekitilgen. Ol kisige laiyqty jumys usynylady. Onyń mamandyǵy, qatynaý jaǵynan tiimdi jaǵy eskeriledi», - dedi ol.
