Eńbek jáne halyqty áleýmettik qorǵaý ministri Birjan Nurymbetov tótenshe jaǵdai kezinde áleýmettik tólem nege barlyq azamatqa berilmeitinin túsindirdi, dep habarlaidy Sputnik Qazaqstan.
"Nege 42 500 teńge barlyq azamatqa birdei berilmeidi? Tótenshe jaǵdaiǵa bailanysty Úkimet tarapynan biraz kómek qarastyryldy, áli de jalǵasyp jatyr. Bir jaǵynan nesie, salyq, qaryzdar shegerildi. Zeinetaqy men járdemaqy toqtaǵan joq. Olar qaita ulǵaidy. Mamyr aiyndaǵy zeinetaqy men járdemaqy sáýirde qosylǵan ústememen birge tólenedi. Halyqtyń turmysy tómen tobyna kommýnaldyq shyǵyndardy óteý úshin 15 myń teńgeden beriletin boldy. Azyq-túlik jaǵynan da kómek qarastyryldy", – dedi Nurymbetov onlain brifingte.
Ministr osyndai kóp kómektiń biri tótenshe jaǵdaiǵa bailanysty kirisinen aiyrylǵandarǵa beriletin 42 500 teńge ekenin atap ótti.
"Sondyqtan bul bólek tólem bolǵannan keiin onyń sharttary bar. Onyń negizgisi – alyp júrgen jalaqyńyzdan, taýyp júrgen tabysyńyzdan tótenshe jaǵdai saldarynan aiyrylǵan jaǵdaida tólenetin tólem", – dedi vedomstvo basshysy.
Buǵan deiin ministr 42 500 teńge alǵany úshin birde bir azamat qylmystyq jaýapqa tartylmaitynyn málimdedi.
Eńbek ministrliginiń aqparatynsha, áleýmettik tólem 3,6 million adamǵa tólengen. Taǵy úsh milliondai adam ártúrli sebepke bailanysty járdemaqyǵa ilikpei qaldy.
