Mindetti vaktsinatsiia - Konstitýtsiia talaptaryna qaishy emes. Bul týraly QR Ádilet ministrliginiń resmi saitynan málim boldy, dep habarlaidy "Ult aqparat".
Saitta jariialanǵan málimetterge qaraǵanda, infektsiialyq jáne parazittik aýrýlardyń paida bolýy men taralýynyń aldyn alý maqsatynda densaýlyq týraly Kodekste kózdelgen sanitariialyq-epidemiiaǵa qarsy is-sharalardyń biri – profilaktikalyq ekpeler.
Meditsinalyq qarsy kórsetilimderi joq, QR aýmaǵynda turaqty turatyn jeke tulǵalar infektsiialyq jáne parazittik aýrýlarǵa qarsy ekpelerdi alýǵa mindetti (Kodekstiń 85-babynyń 4 jáne 8-tarmaqtary), olardyń qataryna KVI-ǵa qarsy profilaktikalyq ekpe de jatady (Qazaqstan Respýblikasy Úkimetiniń 2020 jylǵy 24 qyrkúiektegi № 612 qaýlysyna sáikes).
Osylaisha, meditsinalyq qarsy kórsetilimderi joq adamdar úshin KVI-ǵa qarsy mindetti vaktsinatsiialaýdyń quqyqtyq negizderi bar jáne bul «Memleket adamnyń ómir súrýi men densaýlyǵyna qolaily ainaladaǵy ortany qorǵaýdy maqsat etip qoiady» degen konstitýtsiialyq normaǵa sáikes keledi (Konstitýtsiianyń 31-baby).
«Adamnyń jáne azamattyń quqyqtary men bostandyqtaryna kepildik bere otyryp, QR Konstitýtsiiasy mundai shekteýdiń jol beriletin shekterin belgilei otyryp, olardy shekteý múmkindigin joqqa shyǵarmaidy. Adamnyń quqyqtary men bostandyqtaryn jáne halyqtyń densaýlyǵyn qorǵaý maqsatynda ǵana quqyqtar men bostandyqtar shektelýi múmkin (Konstitýtsiianyń 39-babynyń 1-tarmaǵy)», - delingen ministrlik habarlamasynda.
