Foto: trans.info
250-den asa qazaqstandyq júk kóligi Polsha shekarasynda turyp qaldy. Osylaisha, Eýropaǵa eksporttyq júkterdi jetkizetin qazaqstandyq tasymaldaýshylar shekteýlerge ushyrap otyr. Munyń saldary milliondaǵan shyǵynǵa ákeledi, - dep habarlaidy "Ult aqparat" "Atameken" UKP saityna silteme jasap.
21 aqpannan bastap Varshava ýaqyty boiynsha saǵat 19.00-de Polsha-Belarýs «Kýkýriki-Kozlovichi» shekaralyq ótkelinde júk kólikteriniń qozǵalysyna tyiym salyndy. Bul tyiym Polsha respýblikasy jáne Eýropalyq Odaqqa múshe elder, Eýropalyq erkin saýda qaýymdastyǵy (Eat), Eýropalyq ekonomikalyq keńistik týraly kelisimge múshe elderge jáne Shveitsariia Konfederatsiiasynda tirkelgen kólik quraldaryna áser etpeidi.
Alaida, basqa elder/óńirlerde tirkelgen kólik quraldary bul ótkelden óte almaidy.
«Atameken» UKP Logistika jáne tasymaldaý departamentiniń basqarýshy direktory Murat Amrinniń aitýynsha, «Kýkýriki-Kozlovichi» ótkeli «Bobrovniki-Berestovitsa» ótkeli jabylǵannan keiin qazaqstandyq júk tasymaldaýshylar paidalana alatyn sońǵy múmkindik bolǵan.
«Jańa shekteý elimizge Eýropa elderinen eksporttyq taýar jáne kásiporyndarǵa eýropalyq taýarlardy tasityn qazaqstandyq tasymaldaýshylarǵa da qatysty. Munyń saldary milliondaǵan shyǵynǵa ákep soǵady. 23 aqpandaǵy jaǵdai boiynsha Polsha aýmaǵynda 150-den asa qazaqstandyq avtokólik quraly bar. Taǵy júzden astamy Eýropalyq Odaq baǵytynda júredi. Logistika buzylǵan, tasymaldaý quny qymbattaidy», – dedi Murat Amrin.
Sarapshy Polshada QR Elshiligi men QR IIDM arqyly naqty úilestirý bar ekenin atap ótti.
Qazaqstan Elshiligi tarapynan Polshanyń memlekettik organdaryna otandyq tasymaldaýshylar úshin shekteýdi alyp tastaý qajettigi týraly notalar da joldanǵan.
Eýropalyq Odaq pen EAEO elderin bailanystyratyn jalǵyz qurlyq joly – Litva-Belarýs, Latviia-Belarýs jáne Latviia-Resei shekara ótkelderi arqyly ótetin jol. Sondai-aq, Kaspii teńizi arqyly ótetin balama baǵyt bar. Alaida bul baǵyt Eýropa elderine deiingi qashyqtyqty 1,5 ese uzartyp, kóliktiń birneshe túrin (avto-teńiz) májbúrli paidalanýǵa bailanysty tasymaldaý qunyn 2-3 ese arttyrady, marshrýttaǵy klimattyq jáne geografiialyq jaǵdailardyń áseri (daýyl maýsymy, biik taýlar jáne t.b.) taǵy bar.
Qazirgi kezde QR IIDM «Atameken» Ulttyq kásipkerler palatasy biznes-qoǵamdastyqpen birlesip, Litva tarapymen (qazaqstandyq tasymaldaýshylar úshin) qazaqstandyq mashinalar EO aýmaǵynan Belarýs Respýblikasy men Resei Federatsiiasy baǵytynda kedergisiz shyǵýy úshin Litva Respýblikasy arqyly kedergisiz ótýdi qamtamasyz etý týraly kelissózder júrgizip jatyr. Sondai-aq, Litva tarapyna derekterdi berý maqsatynda ótkelde jinalǵan avtomobilderdiń tizimi jasalǵan.
