Biryńǵai jinaqtaýshy zeinetaqy qory «Qazatomónerkásip» aktsiialaryn satyp aldy. Bul týraly búgin «Astana» halyqaralyq qarjy ortalyǵy Birjasynyń alǵashqy saýda-sattyǵyn iske qosý sharasynda «Samuryq-Qazyna» AQ basqarmasynyń tóraǵasy Ahmetjan Esimov aitty, dep habarlaidy QazAqparat tilshisi.
«Búgin alǵashqy qadam jasaldy. London qor birjasy men «Astana» halyqaralyq qarjy ortalyǵyna bastapqy jariia ornalastyrýǵa «Qazatomónerkásip» ulttyq kompaniiasy tabysty shyǵaryldy. Sheteldik jáne otandyq investorlar álemdik naryqtaǵy kúrdeli jaǵdaiǵa, úlken qubylmalyqqa qaramastan osy oqiǵaǵa aitarlyqtai qyzyǵýshylyq tanytty. IRO-ǵa 49 sheteldik, 16 otandyq zańdy tulǵa, sonymen qatar Qazaqstan Respýblikasynyń 2700 azamaty qatysty. BJZQ-nyń da tabysty qatysýy bizdiń milliondaǵan azamatymyzdyń «Qazatomónerkásip» aktsioneri atanǵanyn bildiredi», - dedi ol.
Onyń aitýynsha, bul kompaniianyń investitsiialyq tartymdylyǵymen qatar imvestorlardyń Qazaqstanda júrgizilip jatqan ekonomikalyq saiasatqa degen senimin bildiredi. Jalpy qazirdiń ózinde ýran kompaniiasynyń aktsiiasyna degen qyzyǵýshylyq tym joǵary. Máselen, kompaniia aktsiiasy IRO-ǵa shyǵarylǵan alǵashqy kúnniń ózinde 45 mln dollarǵa tólem túsken.
«Taiaý kúnderi taǵy da 405 mln dollar túsedi jáne osynaý 450 mln dollardyń barlyǵy Ulttyq qorǵa aýdarylatyn bolady», - dedi Ahmetjan Esimov.
