Premer-ministrdiń birinshi orynbasary Roman Skliar paidalanylmai jatqan jáne zańnamany buza otyryp berilgen jerlerdi memleket menshigine qaitarý jónindegi komissiianyń kezekti otyrysyn ótkizdi, - dep habarlaidy "Ult aqparat" Úkimettiń baspasóz qyzmetine silteme jasap.
Otyrys barysynda aýyl sharýashylyǵy jerlerin anyqtaý jáne qaitarý boiynsha júrgizilip jatqan jumystardyń nátijeleri qaraldy.
"Jyl basynan beri komissiia sheshimimen memleketke 1 million 119 myń gektar jer qaitaryldy. Qazirgi ýaqytta jalpy aýmaǵy 2 million 94 myń gektar jerdi paidalanýshylarǵa qatysty 724 jospardan tys tekserý júrgizilip jatyr, 698,4 myń gektar jerdi tekserý boiynsha 48 ótinish prokýratýra organdarynda tirkeý satysynda tur", - delingen habarlamada.
Jalpy komissiia aýmaǵy 7,45 million gektar jerde 2 584 sýbektige qatysty tekserý júrgizýdi josparlap otyrǵany aityldy. Onyń ishinde egistik alańy – 585,2 myń gektar, jaiylym jer – 6,86 million gektar.
Aita keteiik, osy jyldyń 9 tamyzynda Qazaqstan Respýblikasynyń Prezidenti Jer zańnamasynyń saqtalýyna tekserý júrgizýge moratoriidiń kúshin joiýdy kózdeitin Jarlyqqa qol qoiǵan edi.
Joǵaryda atalǵan sharalardy eskere otyryp, jyl aiaǵyna deiin paidalanylmaǵan jáne zańnamany buza otyryp berilgen aýyl sharýashylyǵy jerleriniń kem degende 5 million gektaryn memleketke qaitarý kózdelgen.
