Milannan koronavirýs juqtyryp kelgen qazaqstandyqpen bir bortta kelgen 89 jolaýshynyń bári anyqtaldy. Bul týraly Nur-Sultan qalasynyń Qoǵamdyq densaýlyq saqtaý basqarmasynyń basshysy Sáýle Qisyqova málim etti, dep habarlaidy QazAqparat.
«13 naýryzda Nur-Sultanda Milannan «Máskeý-Nur-Sultan» áýe reisi arqyly kelgen áielden koronavirýs infektsiiasyn juqtyrǵany anyqtalyp, qalamyzda birinshi jaǵdai tirkelgen edi. Italiia, ózderińiz biletindei, epidemiologiialyq ahýal boiynsha 1A sanatyna jatady. Iaǵni, osy elden kelgen azamattar oqshaýlanýy kerek. Osy ereje boiynsha Qazaqstan azamaty oqshaýlandyrylyp, oǵan laboratoriialyq zertteý júrgizilip, ol adamnyń koronavirýsty juqtyrǵany anyqtaldy», - dedi basqarma basshysy OKQ-da ótken baspasóz máslihatynda.
Onyń aitýynsha, koronavirýs infektsiiasyn juqtyrǵan áielmen birge bortta 89 jolaýshy bolǵan. Onyń ishinde 42 - Qazaqstan azamaty, sheteldik 47 azamat bolǵan (RF – 42, Niderlandy – 1, Avstraliia – 1, AQSh – 1, Ýkraina – 1, Meksika – 1).
«Osy 89 adamnyń bári de tabyldy. Osy adamdardyń ishinde Nur-Sultannan syrtqa 35 jolaýshy shyǵyp ketken. Onyń ishinde 14-i Qazaqstan ishine tarap ketken. Óńirlerdegi áriptesterimizge olar týraly málimetti berdik. Búgin saǵat 08.00 kezinde osy adamdardy tabý boiynsha tekserý júrgizdik. Aimaqtarda olardy oqshaýlaý boiynsha jumys júrgizilýde», - dedi ol.
Sáýle Qisyqova atalǵan borttaǵy taǵy 21 jolaýshy Reseige ushyp ketkenin aitady.
«Nur-Sultan qalasy boiynsha 54 jolaýshynyń 53-i elordadaǵy statsionarlarǵa jatqyzylǵan. RF-nyń bir azamaty diplomatiialyq rang pen RF elshiliginiń nota berýine bailanysty elshilik aýmaǵynda qaldy. 57 adam aýrýhanaǵa tolyǵymen jatqyzyldy. Tolyqqandy laboratoriialyq jumys júrgizildi. Nátije tekserilýde», - dedi ol.
