Taiaý Shyǵystan kelgen migranttardan quralǵan birneshe top taǵy da Eýroodaq aýmaǵyna belorýs-poliak shekarasy arqyly zańsyz ótpek boldy. Olar poliak politseileriniń kólikterine tas laqtyrdy. Bul jóninde Polsha politsiiasy Týitterde habarlady.
Polsha shekara qyzmetiniń aitýynsha, eń iri toptyń quramynda 200 shaqty adam bolǵan, qalǵandarynda ondaǵan adam bolǵan. Olar kúshtik qurylym ókilderine jas aǵyzatyn gaz shashyp, petarda qoldanǵan. Alaida eshqaisysy shekarany buzyp óte almaǵan. Polsha jaǵynan eshkim zardap shekpegen.
Juma, 19 qarashada baqylaý-ótkizý pýnktinen tys jerde shekarany zańsyz kesip ótý talpynysy boiynsha 195 oqiǵa tirkelgen. Qujatsyz júrgen 5 migrant jáne shekarany zańsyz kesip ótýge arandatty degen kúdikke ilingen birneshe adam ustalǵan.
- Biyl Belarýstiń Eýroodaqpen shekarasynda kóshi-qon daǵdarysy týyndady. Buǵan deiin Aleksandr Lýkashenko Belarýs Eýroodaqqa barǵysy keletin qujatsyz migranttar men esirtki saýdagerlerin budan ári qarai bógemeitinin málimdegen.
- Eýroodaq Lýkashenkony daǵdarysty qoldan uiymdastyrdy dep aiyptaidy. Keiingi ailarda Minskige Taiaý Shyǵystan ondaǵan myń migrant kelgen. Kóbi Siriia men Irak azamattary. Kóptegen jýrnalistik zertteýler migranttardyń Eýropaǵa saparyn Belarýs biligi uiymdastyrdy degen boljamdy rastaidy.
- Estoniia SIM Eva-Mariia Liimetstiń aitýynsha, Lýkashenko eger Eýroodaq onyń Belarýs prezidenti ekenin moiyndap, sanktsiianyń kúshin joisa, daǵdarysty toqtatýǵa ýáde bergen. Minsk bul aqparatqa túsinikteme bermedi.
