Foto:instagram.com/kris.p.almaty.official
Almatyda kórshiles elderden kelip jatqan migranttardyń sany artyp jatyr, - dep habarlaidy Tengrinews.kz tilshisi. Olar qalalyq kóshi-qon basqarmasynda saýsaq izin alatyn jerdegi uzyn-sonar kezekke shaǵymdandy.
"Kóshi-qon qyzmet ortalyǵy. Adamdar saýsaq izderin berý úshin eki kún kezekte turady. 1000 adamǵa bir apparat jumys istep tur", - deidi Kris.p.almaty.official.
Almaty qalalyq IID Kóshi-qon qyzmeti basqarmasynyń málimetinshe, sońǵy birneshe kúnde qalalyq kóshi-qon basqarmasyna kórshiles elderden shetel azamattary kóp kelip jatyr. Politseiler muny jumys maýsymynyń bastalýymen jáne karantindik sharalardyń álsireýimen bailanystyrady.
"Kóshi-qon qyzmet ortalyǵynda saýsaq izin anyqtaityn eki apparat bar. Bul fýnktsiiany sot-meditsinalyq sarapshylar atqarady. Sheteldik azamattardyń saýsaq izi odan ári tirkeýge turý úshin qajet. Bul keńse ádettegidei shtattyq rejimde jumys istep tur. Sońǵy eki kúnde sheteldik azamattar kóp kelip jatyr, osyǵan bailanysty qazirgi ýaqytta jaqyn mańdaǵy aýdandyq ishki ister bólimderinde balama retinde qosymsha daktiloskopiialyq kabinetter ashyldy", - dedi Almaty qalalyq IID resmi ókili Saltanat Ázirbek.
Almaty politsiiasy migranttar úshin saýsaq izin alatyn qosymsha úsh bólimshe ashylǵanyn málimdedi. Olar Áýezov, Naýryzbai jáne Almaly aýdandyq ishki ister bólimderinde ashylǵan.
