Qorǵanys ministri Nurlan Ermekbaev apparat otyrysynda MiG-31 ushaǵynyń apatqa ushyraýy saldarynan zardap shekken áskeri ushqyshtardyń otbasylaryna qajetti kómek kórsetýge nusqaý berdi.
Qorǵanys ministrligi baspasóz qyzmetiniń habarlaýynsha, áskeri basshylyqqa Qaraǵandy túbinde MiG-31 áskeri ushaǵynyń qulaýymen bailanysty áýe apatyn muqiiat jáne qysqa merzimde tekserý tapsyryldy.
Qorǵanys vedomstvosynyń basshysy ushqyshtardyń densaýlyq jaǵdaiyn baqylaýǵa alyp, olardyń otbasylaryna qajetti kómek kórsetýge nusqaý berdi.
Ministr barlyq belgilengen sharany oryndaýǵa shuǵyl kirisýdi tapsyrdy.
Qaraǵandy túbindegi áskeri ushaq apaty
16 sáýir kúni keshke qorǵanys ministrligi Qaraǵandy mańynda áskeri ushaq apatqa ushyraǵanyn habarlady. Qozǵaltqyshtan órt shyǵyp, ushqyshtar ushaqty eldi mekennen alys alyp ketken. Ekipaj katapýlta jasap úlgerdi, alaida áskeriler jaraqat alǵan.
Qorǵanys ministri apatty tergeitin komissiia qurdy.
Eki ushqysh ta tájiribeli ekeni aitylyp otyr. Jalpy ushý ýaqyty 1161 jáne 888 saǵat.
Qorǵanys ministrliginiń aqparatyna sáikes, ushaq 1991 jyly shyǵarylǵan. MiG-31 ushaǵy Qazaqstanda tórtinshi ret apatqa ushyrady. Buǵan deiin mundai ushaqtar 2007, 2008 jáne 2013 jyldary apatqa ushyraǵan.
