Qarjy piramidasyn qurdy degen kúdikpen ustalǵan qazaqstandyq vainer Meiirjan Tórebaevty qamaýda ustaý merzimi taǵy bir aiǵa uzardy, - dep habarlaidy "Ult aqparat".
Qalalyq sottyń málimetinshe, tanymal bloger taǵy bir ai qamaýda otyrady.
"Almaty qalasynyń mamandandyrylǵan aýdanaralyq tergeý sotynyń qaýlysymen kúdiktini qamaýda ustaý merzimin is materialdarymen tanysý kezeńinde 30 kúnge uzartý týraly ótinishhat qanaǵattandyryldy, iaǵni 17 qazanǵa deiin uzartyldy", - delingen Almaty qalalyq sotynyń baspasóz habarlamasynda.
Aita keteiik, 10 aqpanda Tórebaev pen Sherniiazovqa qatysty "Qarjylyq (investitsiialyq) piramidany qurý jáne basqarý" baby boiynsha qylmystyq is qozǵalǵany belgili boldy.
Keiin Mudarabah capital qarjy piramidasyna qatysy bar degen kúdikpen birneshe adam ustaldy. Olardyń ishinde tanymal blogerler de bar. Vainerler Meiirjan Tórebaev pen Meiirhan Sherniiazov 20 sáýirden beri qamaýda otyr.
Al Azimjan Saidbaev shetelge qashyp ketken. Ol áli izdestirilip jatyr.
