© Photo: Facebook / Meirjan Týrebaev, Instagram /make_sakevich
Almatynyń Almaly aýdandyq sotynda "Mudarabah Capital", "Astex" jáne "ACD Technology" qarjy piramidalaryn qurý jáne basqarý týraly istiń figýranttary, onyń ishinde belgili qazaqstandyq vainerler Meiirjan Tórebaev pen Meiirhan Sherniiazovqa sot úkimi shyqty. Vainerlerdiń árqaisysy 5 jylǵa bas bostandyǵynan aiyryldy, dep habarlaidy Sputnik Qazaqstan.
Olar jazasyn qaýipsizdigi tómen mekemede óteidi. Blogerler Qazaqstan Qylmystyq kodeksiniń 217-babynyń 3-bóligi "Qarjylyq (investitsiialyq) piramidany qurý jáne oǵan basshylyq etý" boiynsha kináli dep tanyldy. Al Qylmystyq kodekstiń 262-baby "Uiymdasqan top, qylmystyq uiym qurý jáne olarǵa basshylyq etý, sol siiaqty olarǵa qatysý" boiynsha aqtaldy.
"Mudarabah Capital" qarjy piramidasyn qurdy jáne basqardy, sondai-aq uiymdasqan qylmystyq top qurdy jáne oǵan qatysty dep aiyptalǵan qalǵan sottalýshylarǵa mynadai jaza kesildi:
Almas Qurmanǵaliev – 14 jyl,
Daniia Rahimova – 10 jyl,
Erjan Mansurov – 9 jyl,
Erlan Mansurov – 9 jyl,
Rýslan Búrkenov – 12 jyl,
Timýr Rústemov – 12 jyl,
Andrei Cha – 8 jyl,
Samat Qasenov – 8 jyl
Nurlan Sultanbaev – 8 jyl.
Birjan Jarmuhamedov – 6 jylǵa sottaldy.
Olar jazasyn ortasha qaýipsizdiktegi koloniiada óteidi.
Istiń taǵy eki qatysýshysy – Azizjan Saidbaev pen Ádilet Oraz áli izdeýde júr.
Aiyptaý aktisine sáikes, tergeý Almas Qurmanǵalievti qarjy piramidasynyń negizgi uiymdastyrýshysy dep tanydy. Ol 2019 jyly qarjy piramidasyn qurý úshin ózine sybailastar izdei bastaǵan.
Almas Qurmanǵalievtiń birinshi tapqan adamy, ári týysy Erjan Mansurov bolǵan. Ol áý basta "ACD Technology" JShS qurǵan. Dál osy kompaniia kompiýter óndirisine investitsiia tartamyz degen syltaýmen salymshylardyń qarajatyn birinshi bolyp jinaǵan. Olar salymshylarǵa 32 kún ishinde (jylyna 240%) salymnyń 20% mólsherinde dividend tóleýge ýáde bergen. Barlyq jańa salym kompaniiaǵa buryn júgingen klientter aldyndaǵy bereshekti óteýge jumsalǵan.
Memlekettik aiyptaýshynyń aitýynsha, biznestiń órkendep jatqanyn kórip, 2019 jyldyń qarashasynda sottalýshylar taǵy bir kompaniia qurǵan. Ony Almas Qurmanǵalievtiń taǵy bir týysy - Erlan Mansurov basqarǵan. "ASTEX.KZ" JShS "ACD Technology" JShS-ge uqsas áreket etti.
Kelesi qarjy piramidasy – "Mudarabah Capital" JShS 2020 jyly paida boldy. Ony Almas Qurmanǵaliev uiymdastyrǵan dep esepteidi tergeý. Bulardyń jarnamasyn áleýmettik jelilerde vainerler barynsha nasihattaǵan. Olardyń qatarynda belgili qazaqstandyq vainerler Meiirjan Tórebaev pen Meiirhan Sherniiazov, sondai-aq ázirge izdeýde júrgen Ázimjan Saidbaev, istiń taǵy bir figýranty Ádilet Oraz bar.
Sot jábirlenýshilerdiń 1 861 752 441 teńgeden astam somaǵa azamattyq talabyn qanaǵattandyrdy.
