Batys Qazaqstan oblysynyń Terekti aýdanyndaǵy Fedorovka aýylynda birneshe qaiyrymdylyq jobasy iske asyrylyp jatyr, dep habarlaidy QazAqparat.
Munda iri saýyqtyrý kesheni salynyp jatyr. Osy bastamany kóterip ári demeýshi bolyp otyrǵan - metsenat Serjan Idiiatov.
«Fedorovka aýylynda saýyqtyrý keshenin salý - meniń jobam, ony ózim iske asyryp jatyrmyn. Qabyrǵasyn kóterip qoidyq, qazir tóbesin jaýyp jatyrmyz. Jospar boiynsha 2019 jyly paidalanýǵa beremiz», - deidi biznesmen.
Ol izgi ideianyń týyndaý sebebin aitty. «Fedorovka aýyly - qoǵamdyq monshasy joq jalǵyz aýdan ortalyǵy. Keibir aýdan ortalyqtarynda qos-qostan osyndai keshen bar. Budan tys, Fedorovka - meniń týǵan aýylym. Sondyqtan osy jerde 100 adamǵa arnalǵan monsha salýǵa uiǵardym. Qyzmetter aiasyn keńeitip, jabyq basseindi de qostyq. Óitkeni bizdegi jaz qysqa. Budan tys, keshende jańa tehnologiialarmen as ázirleitin pitstseriiada bolady», - deidi metsenat.
Biraq biznesmen bul keshen arqyly tabys tabýdy oilap otyrǵan joq. «Keshenge jumsalǵan qarajattyń ótelýine birneshe jyl ketedi. Eger ony qalaǵa salǵanymda, shyǵyny az bolyp, jyldam óteletin edi», - deidi S. Idiiatov.
Fedorovka aýylynyń turǵyndary keshenniń salynyp bitýin taǵatsyzdana kútip júr. Degenmen bul metsenattyń týǵan aýylyna jasaǵan alǵashqy qaiyrymdylyǵy emes. «Buǵan deiin avtobýstar satyp alyp, baǵdarǵa qostym, zamanaýi aialdama pavilondaryn, dúkender salǵyzdym. Óitkeni, aýyldyń arasy uzaq, balalar mektepke barý úshin 4 shaqyrym jol júredi. Qazir eki aialdamanyń qurylysy aiaqtaldy», - deidi metsenat.
Keshen qurylysy aiaqtalǵan soń metsenat ony jergilikti iskerlerge tegin bermek.
«Olar bul nysandarda óz jobalaryn iske asyrýyna bolady. Konkýrs jariialaǵanbyz, bolashaǵy zor jobalardy qarap jatyrmyn. Iriktelgen jobalardyń avtorlaryna nysandardy tegin beremin», - deidi S. Idiiatov.
2017 jylǵy 12 sáýirde Qazaqstan Prezidenti Nursultan Nazarbaev «Rýhani jańǵyrý» atty kólemdi maqalasynda «Týǵan jer» baǵdarlamasyn iske asyrýdy usynǵan bolatyn.
Baǵdarlama aiasynda qazaqstandyqtar búkil respýblikada óz qarajattaryna túrli jobalardy iske asyryp, týǵan ólkesin damytýǵa úles qosyp keledi.
