باتىس قازاقستان وبلىسىنىڭ تەرەكتٸ اۋدانىنداعى فەدوروۆكا اۋىلىندا بٸرنەشە قايىرىمدىلىق جوباسى ٸسكە اسىرىلىپ جاتىر, دەپ حابارلايدى قازاقپارات.
مۇندا ٸرٸ ساۋىقتىرۋ كەشەنٸ سالىنىپ جاتىر. وسى باستامانى كٶتەرٸپ ەرٸ دەمەۋشٸ بولىپ وتىرعان - مەتسەنات سەرجان يديياتوۆ.
«فەدوروۆكا اۋىلىندا ساۋىقتىرۋ كەشەنٸن سالۋ - مەنٸڭ جوبام, ونى ٶزٸم ٸسكە اسىرىپ جاتىرمىن. قابىرعاسىن كٶتەرٸپ قويدىق, قازٸر تٶبەسٸن جاۋىپ جاتىرمىز. جوسپار بويىنشا 2019 جىلى پايدالانۋعا بەرەمٸز», - دەيدٸ بيزنەسمەن.
ول ٸزگٸ يدەيانىڭ تۋىنداۋ سەبەبٸن ايتتى. «فەدوروۆكا اۋىلى - قوعامدىق مونشاسى جوق جالعىز اۋدان ورتالىعى. كەيبٸر اۋدان ورتالىقتارىندا قوس-قوستان وسىنداي كەشەن بار. بۇدان تىس, فەدوروۆكا - مەنٸڭ تۋعان اۋىلىم. سوندىقتان وسى جەردە 100 ادامعا ارنالعان مونشا سالۋعا ۇيعاردىم. قىزمەتتەر اياسىن كەڭەيتٸپ, جابىق باسسەيندٸ دە قوستىق. ٶيتكەنٸ بٸزدەگٸ جاز قىسقا. بۇدان تىس, كەشەندە جاڭا تەحنولوگييالارمەن اس ەزٸرلەيتٸن پيتستسەرييادا بولادى», - دەيدٸ مەتسەنات.
بٸراق بيزنەسمەن بۇل كەشەن ارقىلى تابىس تابۋدى ويلاپ وتىرعان جوق. «كەشەنگە جۇمسالعان قاراجاتتىڭ ٶتەلۋٸنە بٸرنەشە جىل كەتەدٸ. ەگەر ونى قالاعا سالعانىمدا, شىعىنى از بولىپ, جىلدام ٶتەلەتٸن ەدٸ», - دەيدٸ س. يديياتوۆ.
فەدوروۆكا اۋىلىنىڭ تۇرعىندارى كەشەننٸڭ سالىنىپ بٸتۋٸن تاعاتسىزدانا كٷتٸپ جٷر. دەگەنمەن بۇل مەتسەناتتىڭ تۋعان اۋىلىنا جاساعان العاشقى قايىرىمدىلىعى ەمەس. «بۇعان دەيٸن اۆتوبۋستار ساتىپ الىپ, باعدارعا قوستىم, زاماناۋي ايالداما پاۆيلوندارىن, دٷكەندەر سالعىزدىم. ٶيتكەنٸ, اۋىلدىڭ اراسى ۇزاق, بالالار مەكتەپكە بارۋ ٷشٸن 4 شاقىرىم جول جٷرەدٸ. قازٸر ەكٸ ايالدامانىڭ قۇرىلىسى اياقتالدى», - دەيدٸ مەتسەنات.
كەشەن قۇرىلىسى اياقتالعان سوڭ مەتسەنات ونى جەرگٸلٸكتٸ ٸسكەرلەرگە تەگٸن بەرمەك.
«ولار بۇل نىسانداردا ٶز جوبالارىن ٸسكە اسىرۋىنا بولادى. كونكۋرس جارييالاعانبىز, بولاشاعى زور جوبالاردى قاراپ جاتىرمىن. ٸرٸكتەلگەن جوبالاردىڭ اۆتورلارىنا نىسانداردى تەگٸن بەرەمٸن», - دەيدٸ س. يديياتوۆ.
2017 جىلعى 12 سەۋٸردە قازاقستان پرەزيدەنتٸ نۇرسۇلتان نازارباەۆ «رۋحاني جاڭعىرۋ» اتتى كٶلەمدٸ ماقالاسىندا «تۋعان جەر» باعدارلاماسىن ٸسكە اسىرۋدى ۇسىنعان بولاتىن.
باعدارلاما اياسىندا قازاقستاندىقتار بٷكٸل رەسپۋبليكادا ٶز قاراجاتتارىنا تٷرلٸ جوبالاردى ٸسكە اسىرىپ, تۋعان ٶلكەسٸن دامىتۋعا ٷلەس قوسىپ كەلەدٸ.
