Messendjerlerde "Qazaqstandaǵy 5G synaqtary" týraly jalǵan habarlamalar tarap jatyr, - dep habarlaidy StopFake.kz.
Internet qoldanýshylar aýdiohabarlamany belsendi túrde taratyp jatyr. Onda belgisiz áiel 5G jelisiniń synaqtaryna bailanysty elde tele jáne radiohabarlar óshiriletinin aitady. Sondai-aq, aýdioroliktiń avtory qazaqstandyqtardy internetti paidalanbaýǵa shaqyrady, óitkeni, onyń pikirinshe, bul "densaýlyqqa qaýipti" bolýy múmkin.
Biraq bul habarlama shyndyqqa janaspaityn bolyp shyqty.
"Keibireýlerdiń murnynan, qulaǵynan qan aqty. Jalpy qyzdar osy 5-6 kún boiy keshke jumystan kelgen soń kitap oqyp, jýrnaldar qarasaq eshteńe etpeidi. Teledidar kórmeńizder, telefonǵa jaqyndamańyzdar, eshteńe qospańyz, sonda ǵana balalaryńyzdyń, nemerelerińizdiń densaýlyǵyn saqtai alasyz. Bul senimdi aqparat, naqty aqparat, óitkeni memleket ne bolatynyn naqty aitpaidy. Biraq dál osyndai jaǵdai bolady", - delingen jalǵan habarlamada.
"Qazteleradio" ókilderi bul málimetti joqqa shyǵardy.
"Qurmetti abonentter, qazirgi ýaqytta WhatsApp messendjeri arqyly teleradio habarlaryn taratýdyń spýtniktik jáne efirlik jelilerinde josparly-profilaktikalyq jumystardy júrgizýge qatysty jalǵan aqparat tarap jatyr. Sizden dúrbeleńge boi aldyrmaýdy jáne resmi derekterge senýdi suraimyz", - dedi kompaniia ókilderi.
