Meshittegi ýaǵyz tek qazaq tilinde bolýy tiis. Bul týraly búgin elordada ótip jatqan «Qazirgi kezeńdegi ekstremizm men terrorizmniń aldyn alý men jolyn kesýdiń zańnamalyq jáne institýtsionaldyq sharalary» taqyrybyndaǵy dóńgelek ústel otyrysynda «Bolathan Taijan» qorynyń prezidenti Muhtar Taijan málim etti. Bul týraly QazAqparat jazdy.
«Menińshe, ekstremizm men lańkestiktiń basty sebebi - kedeishilik pen jumyssyzdyq. Sondyqtan osynda otyrǵan Úkimet músheleriniń jaýapkershiligi zor dep bilemin. Kommýnikatsiialyq saiasat basqasha bolýy qajet. Elimizde kedeishilik, jumyssyzdyq bolmaýy tiis. Óitkeni elimiz bai. Elimizde 17-aq million adam bar. Qazirgi dúniejúzilik ahýal ózgerip ketti. Sondyqtan biz Úkimetten basqa ekonomikalyq saiasat kútip otyrmyz», - dedi ol.
M.Taijan atalǵan qaýip-qaterdiń ekinshi negizgi sebebi bilim júiesindegi olqylyqtar degen oiyn bildirdi.
«Menińshe, osy 20 jyldyń ishinde, ókinishke orai, bilim júiesi álsiz bolyp ketti. Bul salada da úlken reforma kerek dep oilaimyn. Kelesi ekstremizm men lańkestik sebebi - memlekettiń ádilettiligi. Qatelespesem, Platon «Memlekette ádildik bolmasa, onda ol memleket quridy» degen edi. Sondyqtan bizdiń elimizde ádilettilik óte joǵary deńgeide bolýy kerek. Ádilettilik joǵary qundylyqqa ainalýy tiis»,- dedi qor prezidenti. Sonymen qatar ol jańadan qurylǵan Din isteri jáne azamattyq qoǵam ministri Nurlan Ermekbaev joǵarydaǵy máselelerge qatysty pikirin tek orys tilinde ǵana emes, qazaqsha da bildirý kerek dep esepteitindigin aitty. «Óitkeni, jastardyń basym kópshiligi qazaq tildi. Búgingi jastar sizdi túsinbeidi. Sizdiń meshitterdegi ýaǵyz orys tilinde bolýy kerek degen sózińizdi qoldamaimyn. Meshitke baratyn jamaǵattyń 99 paiyzy qazaqtildi azamattar», - dedi ol ministrge qarata.
