Foto: videodan skrinshot
Áleýmettik jelide meshitte namaz oqyp turǵan er adamdy soqqyǵa jyqqan turǵynnyń videosy tarady. Búginde oqiǵanyń mán jaiy tekserilip jatyr. Al quqyq buzýshylyq oryn alǵan meshit imamy jaǵdaidyń qalai bolǵanyn aityp berdi. Jalpy meshittegi namaz oqý erejesi qandai? Bul týraly "Ult Aqparat" Otyrarǵa silteme jasap habarlaidy.
Shymkentte ózge mázhabta namaz oqyǵan er adam soqqyǵa jyǵyldy. Oqiǵa qaladaǵy Abdýssattar Smanov meshitinde oryn alǵan. Videodan meshitte namaz oqyp jatqan jamaǵatty kórýge bolady. Bir sátte er adam kútpegen jerden qasynda turǵan azamatty uryp qulatyp, aiaǵymen tepkilei bastaidy. Quqyq buzýshylyq oryn alǵan meshit imamy bul oqiǵanyń mán jaiyn túsindirdi.
Berik Shotabekov, Abdýssattar Smanov meshitiniń imamy:
«Ózge óńirden kelgen 10-15 shaqty azamatqa namaz aldynda imam birneshe ret eskertý jasaǵan. Bizde QMDB boiynsha, ishki tártip boiynsha búkil Qazaqstan aýmaǵynda Hanafi mázhabynda «ámindi» ishten aitylady dep eskertildi. Jáne de osy eskertýge qulaq aspastan birneshe ret namazdy buzýǵa, imamnyń jumysyna kedergi jasaǵan azamatqa shydai almaǵan jamaǵatymyz ony qatty emotsiiaǵa berilip, qol jumsap jiberdi»
Búginde oqiǵanyń mán jaiyn politsiia tekserip jatyr. Belgili bolǵandai bul jaǵdai 12 mamyr kúni keshki 19:00 shamasynda oryn alǵan.
Shymkent qalasy PD baspasóz qyzmeti:
«Oqiǵa qatysýshylary politsiiaǵa aryzdandy. Taǵaiyndalǵan saraptamalardyń nátijesimen protsessýaldy sheshim qabyldanady»
Qazaqstan musylmandary dini basqarmasy meshitke kelýshi jamaǵatty meshit erejesine baǵynýǵa, sonymen qatar qulshylyq úiinde sabyr saqtap, kórkem minez tanytýǵa shaqyrady. Eskerte ketsek, bekitilgen «Meshit erejesi» boiynsha Qazaqstan musylmandarynyń aýyzbirshiligi men birtutastyǵyn qamtamasyz etý úshin elimizdegi namaz ben dini rásimder Ábý Hanifa mázhaby boiynsha oryndalady.
