CC0 / Myriams-Fotos /
Ádilet ministri Azamat Esqaraev meshitterde neke qiiý rásiminen buryn zańdy kýálikti talap etýge qatysty pikir bildirdi, dep habarlaidy Sputnik Qazaqstan.
Búgin Astanada ótken brifingte jýrnalister ministrden zańdy kýáliksiz meshitte neke qiiatyn adamdar týraly surady. Ondaida áielder zańdy turǵyda qorǵalmai qalady. Sebebi er adam kez kelgen ýaqytta nekeni buza alady, óz mindetterin atqarmaýy da múmkin. "Osy turǵyda qandai da bir ózgerister bol ma", - dedi tilshi.
Ádilet ministri aldymen Konstitýtsiianyń negizgi babyn eske saldy.
"Birinshiden, Konstitýtsiia boiynsha biz - zaiyrly, demokratiialyq jáne quqyqtyq memleketpiz. Sondyqtan barlyq azamat zańnyń talaptaryn saqtaýy tiis. Nekege turý úshin tártip boiynsha memlekettik organǵa júginý kerek. Ony ne úshin isteidi? Nekege turatyn adamdardyń, sonyń ishinde áielderdiń quqyǵyn qorǵaý úshin jasaidy. Al neke memlekettik organdarda tirkelmese, belgili bir máseleler bar, qaýip-qaterler bar degen sóz", - dedi Esqaraev.
Ministrdiń aitýynsha, sanaly túrde turmysqa shyǵatyn qyzdar zańdy kýálikti alýǵa tyrysady. Al er adam nekeni resmi túrde tirkemeimin dese, onyń áreket kúdik týǵyzýy kerek.
"Negizi, meniń bilýimshe, meshitterde zańdy kýálikti kórsetý talaby bar, imamdar aldymen neke qiiý týraly kýálikti suraidy. Ol durys, meshitterde ondai qujatty talap etýi kerek. Sosyn ǵana meshitte neke qiiý qajet. Men ózim úilengende solai istegenmin", - dep atap kórsetti Esqaraev.
Alaida meshitterde zańmen neke qiiý týraly kýálikti talap etý mindettelmeidi.
"Negizi, bul másele zańǵa da bailanysty emes, áiel men er adamnyń nietine bailanysty. Qazir ártúrli qarym-qatynastar bolady, ony ózińiz de jaqsy bilesizder. Nekeni zańdy túrde tirkeý kerek", - deidi ádilet ministri.
