Sýret: aikyn.kz
QR Qorǵanys ministrligi men Qarjy naryǵyn retteý jáne damytý agenttigi merzimdi qyzmettiń sarbazdaryna «nesielik demalys» berý týraly memorandýmdy bekitti. Qujatqa qos vedomstvo basshysy general-polkovnik Rýslan Jaqsylyqov pen Mádina Ábilqasymova qol qoidy, dep habarlaidy "Ult aqparat" Qorǵanys ministrliginiń baspasóz qyzmetine silteme jasap.
Qorǵanys vedomstvosynyń bul bastamasy merzimdi qyzmettegi áskeri qyzmetshilerge áskeri qyzmet ótkerý kezeńinde óz nesielerin umytýǵa múmkindik beredi. Nesieler boiynsha tólemderdi keiinge qaldyrý sarbazdardyń barlyq bankter men mikroqarjy uiymdarynan alǵan aqshalai qaryzdaryn toqtata turýdy kózdeidi.
"Memorandýmdy iske asyrý úshin Qorǵanys ministrliginiń agenttikpen jáne qarjy uiymdarymen ózara is-qimylynyń arnaiy algoritmi ázirlendi. Osyǵan sáikes, shaqyrý naýqany kezinde bolashaq Otan qorǵaýshylardyń jinalǵan banktik qaryzdary men shaǵyn nesieleri týraly málimetter birden Qarjy naryǵyn retteý jáne damytý agenttigine jiberiledi.
Osy derekterdiń negizinde kreditorlar negizgi borysh pen syiaqy boiynsha tólemderdi keiinge qaldyrý jáne bereshekti óndirip alýdyń barlyq nysandaryn toqtata turý máselelerin pysyqtaidy" - delingen habarlamada.
Tólemderdi keiinge qaldyrý kezeńinde kreditor sotqa berýdi, bereshekti óndirip alý maqsatymen atqarýshylyq jazba jasaý úshin notariýsqa júginýdi, turǵyn úidi satýdy, qaryz alýshynyń otbasyn páterden shyǵarýdy toqtata turady. Sondai-aq, sot aktilerine sáikes kreditor bereshekti óndirip alýdyń barlyq nysandaryn toqtatýǵa mindetteledi.
Jalpy, memorandým qarjylyq qyzmetterdi tutynýshylardyń zańdy múddelerin ýaqtyly qorǵaýǵa baǵyttalǵan. Ol sondai-aq áskeri qyzmettiń belgilengen merzimin ótkerý kezeńinde merzimdi qyzmettegi áskeri qyzmetshilerdiń qaryzdary men shaǵyn nesieleri boiynsha mindettemelerdi oryndai almaýyna bailanysty týyndaityn áleýmettik shielenisti joiýǵa yqpal etpek.
