Merzimdi áskeri qyzmetin ótegenderge joǵary bilim alýǵa jeńildik beriletin bolady, dep habarlaidy "Ult aqparat".
"Qorǵanys ministrligi Ǵylym jáne joǵary bilim ministrligimen, sondai-aq elimizdiń jetekshi joǵary oqý oryndarymen birlesip, azamattardyń merzimdi áskeri qyzmetin óteýge yntasyn arttyrý maqsatynda jańa joba bastaýdy kózdep otyr.
Ol merzimdi áskeri qyzmet ótkergen barlyq azamatqa áńgimelesý nátijelerine qarai Ulttyq biryńǵai testileýdi esepke almai, áskeri boryshyn ótegen soń eki jyl ishinde aqyly negizde joǵary oqý oryndaryna túsýge múmkindik beredi" - delingen habarlamada.
Demek, olar kúntizbe boiynsha kúzde áskerden kelgen soń, oqýǵa túse alady. Al burynǵy áskeri qyzmetshiler joǵary oqý oryndarynyń áskeri kafedrasynda tegin oqi alady.
"Jeke qasietterine, úlgili tártibine jáne merzimdi áskeri qyzmetin óteý kezeńinde jaýyngerlik daiarlyqta qol jetkizgen joǵary nátijelerine qarai áskeri qyzmetshilerge joǵary oqý ornynyń granty esebinen tegin joǵary bilim alý múmkindigi beriledi. Mundai jastarǵa Qorǵanys ministrliginiń áskeri oqý oryndaryna emtihansyz jáne UBT-ny esepke almai-aq oqýǵa túsý múmkindigi berilmek.
Áskeri oqý oryndaryna emtihansyz túsý jáne azamattyq joǵary oqý oryndarynda oqý grantyn alý kezinde áskeri qyzmetshilerdiń Otan aldyndaǵy boryshyn ótegen balalaryna da basymdyq beriledi dep otyr" - delingen habarlamada.
Jobany iske asyrý bilim berý salasyndaǵy zańnamaǵa ózgerister engizýdi talap etpeidi.
Elimizdiń barlyq óńirindegi qyryqqa jýyq joǵary oqý orny áskeri boryshyn ótegen azamattarǵa bilim alýǵa jeńildikter beretinin rastady.
Qorǵanys ministrligi tiisti erejelerge ózgerister engizý jumystaryn bastap ketti. Jobany iske asyrý 2023 jyldan bastalady. Mundai jeńildikter qazirgi ýaqytta boryshyn ótep júrgen azamattarǵa jáne 2022 jyly áskerge shaqyrylýǵa jatatyn sarbazdarǵa beriletin bolady.
