Eger Máskeý "Soltústik aǵyn – 2" gaz qubyryn "qarý" retinde paidalanatyn bolsa, Germaniia Reseige taǵy da sanktsiia salý jóninde másele kóteredi. Bul jóninde Germaniia kantsleri Angela Merkel Kievte Ýkraina prezidenti Vladimir Zelenskiimen kelissózden keiin ótken baspasóz jiynynda aitty, dep habarlaidy "Ult aqparat" Azattyq radiosyna silteme jasap.
Merkel Resei gazyn Ýkraina arqyly tasymaldaý týraly kelisim jóninde de sóz qozǵady. 2024 jyly aiaqtalatyn bul kelisim jaily Máskeýdegi kezdesýde Resei prezidenti Vladimir Pýtinge ustanymyn jetkizgenin aitty.
Ýkraina prezidenti Vladimir Zelenskii "Soltústik aǵyn - 2" gaz qubyryna bailanysty qaýiptenetinin, Kiev Resei gazy 2024 jyldan keiin de Ýkraina arqyly tasymaldanatynyna naqty kepildik qalaitynyn bildirdi. Onyń sózine qaraǵanda, bul másele jónindegi kelissózder endi bastalǵan.
Merkel Kievke Máskeýge jasaǵan resmi saparynan keiin "Qyrym platformasy" qarsańynda keldi. Álemniń ondaǵan eliniń ókilderi men birneshe memleket basshysy qatysatyn bul is-sharada Resei anneksiialaǵan Qyrymǵa bailanysty máseleler talqylanady. Alaida oǵan Batystyń jetekshi elderiniń basshylary emes, ministrleri keletinge uqsaidy.
Merkel óziniń ne sebepti qatyspaitynyn "Aýǵanstannan evakýatsiialaý máselesimen shuǵyl ainalysý qajettigimen" bailanystyrdy.
Bul sapar - Merkeldiń Kievke kantsler retindegi sońǵy sapary. Ol aldaǵy qyrkúiekte ótetin Býndestag sailaýynan keiin qyzmetinen ketedi.
"Soltústik aǵyn – 2" – Germaniiaǵa Baltyq teńiziniń túbimen Resei gazyn jetkizetin gaz qubyry. AQSh pen Ýkraina jáne Batystyń kei elderi Resei bul qubyrdy qysym jasaý quraly retinde paidalanýy múmkin dep esepteidi. Sol sebepti bul qubyrdy salýǵa da qarsy bolǵan edi.
AQSh pen Germaniia "Soltústik aǵyn – 2" gaz qubyry iske qosylǵanannan keiin de Reseidi Ýkraina arqyly gaz tasymalyn jalǵastyra berýge kóndiretini jaily memorandýmǵa qol qoiǵan. Resei Ýkrainany ainalyp ótetin gaz qubyryn Ýkraina – Resei arasyndaǵy janjal kúrt kóbeigen kezde bastaǵan. Qubyr biyldyń ózinde paidalanýǵa berilýi múmkin.
