Elbasymyz jańa 2019 jyldy «Jastar jyly» dep jariialap, elimizdiń jasampaz túlekterimen arnaiy kezdesip, mazmundy suhbat ótkizýi biz úshin eleýli oqiǵa boldy.
Qazaqstan egemendik alǵaly alǵashqy kúnnen bastap, Nursultan Ábishuly Nazarbaev jastar máselesin bir sát umytqan emes. Oǵan elimizde jańadan salynǵan jańa mektepter men joǵary oqý oryndarynyń ásem ǵimarattary, sport keshenderi, jastar sarailary kýá.
Elbasymyzdyń qazaqstandyq jastarǵa tereń bilim berýimen qatar, saliqaly tárbie qajet ekendigin de únemi aityp keledi. Ásirese ata-babamyzdan mura bolyp qalǵan – úlkendi syilaý, bireýdiń ala jibin attamaý, eli men jerin sheksiz súiý, tarihyn, mádenietin jan-jaqty bilý, ǵylym men bilimdi bir kisidei meńgerý siiaqty qaǵidalardy qazirgi zaman talabyna orai qalai júzege asyrýǵa bolady degen tolǵamdy oilary barsha halyqtyń kóńilinen shyqsa kerek.
Al biz, jas qalamgerlerdiń «Ulttyq ádebietimizdiń bolashaǵy jas jazýshylar úshin Ádebiet akademiiasyn ashý kerek» degen usynysyn qýana qoldaimyz. Buǵan deiin bizdiń talantty jas qalamgerlerimiz Máskeýde, shet elderden tiip-qashyp ádebi bilim alatyn, endi mine, sol joǵary bilim uiasy ózimizden ashylǵaly tur. Buǵan qalai qýanbassyń!
Maqtanǵandyq emes, qazaq jastary asa talantty. Qazir úsh nemese odan da kóp tildi biletin jastarymyz molaiyp keledi. Sonyń arqasynda qazaq balalary álemniń eń úzdik joǵary oqý oryndarynda bilim alýda.
Qazaqty búkil álemge tanytyp, ózge ulttardy qazaqsha sóiletip, án salǵyzyp júrgen Dimash Qudaibergenov, kinoaktrisa Ásel Islamova, marqum Denis Ten taǵy basqa talanttarymyz – bizdiń táýelsiz elimizdiń túlekteri. Sondyqtan biz Memleketimizdiń jastarǵa degen ákelik qamqorlyǵyna dán rizamyz.
Mereke QULKENOV,
jazýshy,
Qazaqstan Jazýshylar odaǵy
basqarma Tóraǵasynyń orynbasary,
«Qurmet» ordeniniń iegeri
