Astanaǵa kelgen ShQO turǵynynan meningokokk juqpasy anyqtaldy, dep habarlaidy QazAqparat tilshisi.
Naýqas 1 qazan kúni Astanaǵa kelgen jáne Astana juqpaly aýrýlar aýrýhanasynyń jansaqtaý bólimine túsken.
«1985 jyly týǵan shyǵysqazaqstandyq 1 qazan kúni Astana qalasynyń juqpaly aýrýlar aýrýhanasyna jedel járdem kóligimen jetkizildi. Zerthanalyq tekserýler arqyly meningokokk diagnozy rastaldy. Juqpa týraly shuǵyl habar kelip túskennen bastap, departament mamandary infektsiiaǵa qarsy jumystardy bastady. Astana boiynsha naýqaspen qatynasta bolǵan 6 adam anyqtaldy, onyń ekeýi bala. 2 qazan kúni barlyǵy bakterologiialyq tekserýden ótti jáne olardyń eshqaisysynan aýrý tabylmady», - dep túsindirdi Memlekettik-sanitarlyq epidemiologiialyq qadaǵalaý komitetiniń Astana qalalyq departamentiniń Epidemiologiialyq qadaǵalaý bóliminiń bas mamany Aqmaral Meiirmanova.
Epidemologiialyq anamnez jinaý barysynda naýqastyń 13 jáne 30 qyrkúiek kúnderi Qaraǵandy oblysynyń Jezqazǵan qalasynda bolǵany anyqtalǵan. 2 qazan kúni Qaraǵandy oblysyna habar berilip, juqpaǵa qarsy sharalar júrgizilgen.
«Naýqas esin jidy. Qazirgi ýaqytta jaǵdaiy ortasha aýyr. Ol patogenetikalyq, simptomatikalyq jáne antibakteriialyq em qabyldap jatyr. Bul kúz mezgilinde Astanada tirkelgen birinshi oqiǵa, onda da aýrýdy Astana qalasynda juqtyrmaǵanyn atap ótken jón», - dedi A. Meiirmanova.
Mamannyń aitýynsha, jyl basynan beri Astanada meningokokk juqpasyna qatysty 7 jaǵdai tirkelgen jáne ólim-jitim bolmaǵan.
«Astanadaǵy epidemiologiialyq jaǵdai turaqty, ótken jylǵy kezeńmen salystyrǵanda kórsetkishter azaiǵan. Infektsiiany juqtyrmaý úshin taza aýada kóbirek júrip, bólmelerdi jeldetý kerek jáne aýrý juqtyrý qaýpi bar oryndarǵa barmaǵan jón», - dep keńes berdi A. Meiirmanova.
