Almaty qalalyq Qoǵamdyq densaýlyq basqarmasynyń basshysy Tileýhan Ábildaev Ortalyq qalalyq klinikalyq aýrýhana qyzmetkerleriniń jappai koronavirýs juqtyrýyna qatysty pikir bildirdi, dep habarlaidy QazAqparat.
«Men dárigerlerdi aiyptai almaimyn. Alaida, eger qaýipsizdik sharalaryn durys saqtansa, qyzmetkerler jappai juqtyrmas edi. Bul - qalamyzdaǵy iri aýrýhanalardyń biri. Munda kóbinese patsientter shuǵyl jetkiziledi. Bizde naýqastardyń kópshiligi koronavirýspen aýyrǵany belgisiz ótti. Soqyrishek, pankreatit, holetsistitpen aýyryp túsken naýqastardy COVID-19 juqtyrǵandardan ajyratý múmkin bolmady. Shuǵyl statsionar jaǵdaiynda jumys istep júrgen qyzmetkerler juqtyrýy múmkin. Bul jaǵdaida mindetti túrde tereń epidemiologiialyq tekserý júrgizilýi tiisti. Sosyn qala ákiminiń orynbasary Erjan Babaqumarov bastaǵan komissiia sheshim shyǵarady», - dedi T.Ábildaev.
Onyń aitýynsha, qazir qaladaǵy barlyq aýrýhanalar men emhanalar provizorlyq emhana rejiminde jumys istep jatyr. Basqarma basshysy bul oqiǵaǵa óziniń de jaýapty ekenin jetkizdi.
«Men basqarma basshysy retinde ózimniń de jaýapty ekenimdi bilemin», - dedi ol.
Onyń aitýynsha, mundai oqiǵa álemniń barlyq elderinde bolyp jatyr.
«Qazir bul infektsiianyń óte juqpaly ekendigin Qazaqstanda ǵana emes álem boiynsha kórip otyrmyz. Tipti damyǵan elderde jai adamdardyń da, meditsina mamandarynyń da arasynda juqtyrý tirkelip jatyr. Biz ózimizge qajetti tájiribe jinap jatyrmyz. Bolashaqta bul basqa infektsiialarmen kúreste septigin tigizbek. Meniń oiymsha, bizdiń dárigerlerdiń biliktiligi arta túsedi», - dedi Tileýhan Ábildaev.
