Atyraýda qonaq úidegi órtten balalardy qutqarǵan Nurken Dúisenbaev oqiǵanyń qalai órbigenin aityp berdi, dep habarlaidy QazAqparat tilshisi.
"Kórshiles qonaq úiden órt shyqqanyn estisimen, sonda júgirip bardym. Onda ekinshi qabatqa kóteriletin baspaldaq bolǵan joq. Biraq qabyrǵaǵa jaqyn qoiylǵan bannerdi kórip, sonyń ústine shyqtym. Terezeden ishke kirip, tórt balany kórdim. Bárin terezeden shyǵaryp, tómendegi jigitterge berdim. Kelesi bólmede taǵy 4 bala otyrdy, olardy da terezeden shyǵardym. Sosyn órt sóndirýshiler keldi", - dedi "Bashnia" meiramhanasynyń kúzetshisi Nurken Dúisenbaev.
Nurken Dúisenbaev 21 jasta. Ol Taraz qalasynan kelip, Atyraý munai jáne gaz institýtyna oqýǵa túsken. Meiramhanada kúzetshi bolyp, qosymsha tabys tabady.
"Menen batyr jasaýdyń qajeti joq. Meniń ornymda bolǵan kez kelgen adam kómekke keler edi. Onyń ústine balalar bolsa, esh oilanbastan járdemdesý qajet", - dedi ol.
Eske sala ketsek, 16 maýsym kúni túnde Atyraýdyń M.Áýezov kóshesindegi «Raihan» qonaqúii órtengen. Órt ǵimarattyń astyńǵy qabatynda ornalasqan saýnadan shyqqan. Oqiǵa ornynda órt sóndirýshiler 3 balany qutqarǵan. Oǵan deiin sol mańdaǵy adamdar janyp jatqan ǵimarattan 29 bala men eki eresek adamdy qaýipsiz jerge shyǵaryp úlgergen.
Oblystyq TJD ishtegilerdi qutqarýǵa kirisken birneshe jas jigittiń aty-jónderin anyqtap jatqanyn málim etti. Áleýmettik jelide taralǵan kýágerlerdiń jazbasynda «Bashnia» meiramhanasynyń kúzetshisi eń birinshi kómekke umtylyp, erekshe kózge túskeni jóninde aitylǵan bolatyn.
