Úkimettiń búgingi otyrysynda "Atameken" ulttyq kásipkerler palatasynyń basshysy Abylai Myrzaxmetov ulttyq ekonomika ministri Qýandyq Bishimbaevtyń indýstrialdyq aimaqtarǵa qatysty málimetterimen kelispedi. Osy oraida Premer-ministr Baqytjan Saǵyntaev ministrge emes, "Atameken" basshysynyń sózine kóbirek senetinin jetkizdi, dep xabarlaidy Baq.kz tilshisi.
QR Ulttyq ekonomika ministri Qýandyq Bishimbaevtyń aitýynsha, elimizde 25 indýstrialdyq aimaqty qurýǵa 24,4 mln. teńge bólindi. Búginde 12 indýstrialdyq aimaq jumys istep, onda jalpy sommasy 700 mlrd. teńgeniń 273 óndiris orny ornalasqan. Ol jerde 626 mlrd. teńgeniń ónimi shyǵaryldy.
"Aǵymdaǵy jylda Aqtóbe, Qyzylorda, Almaty, Ońtústik Qazaqstan jáne Qostanai oblystarynda indýstrialdyq jobalady qurýǵa 4,5 mlrd. teńge qarastyrylǵan",-dedi Q.Bishimbaev.
Alaida "Atameken" ulttyq kásipkerler palatasynyń basshysy Abylai Myrzaxmetov ministr usynǵan málimettermen kelispedi. Ony Premer-ministr de qoldady.
"Qýandyq Ýálixanuly (Qýandyq Bishimbaev - ulttyq ekonomika ministri), endi, bul jerde Abylai Isabekuly (Atamekenniń basshysy - avt.) indýstrialdyq aimaqtar boiynsha keibir málimettermen kelispei otyrmyn deidi. Árine, men bul jerde óz adamdaryma qaraǵanda, Atamekenge kóbirek senemin. Sebebi olar bar máseleni boiamasyz aitady. Biz bolsaq, ministrlikterde, aimaqtarda otyrǵan bizdiń áriptestermizdiń bergen málimetterine senip otyra beremiz", - dep atap kórsetti B.Saǵyntaev.
